Litlar tortillur - flottar í veisluna
Uppruni
Það hefur verið mjög vinsælt á heimilinu að undanförnu að vera með litlar tortillur í matinn. Þá baka ég tortillur, bý til salsa, chilimæjó og avókadósósu. Bæði hægt að vera með kjúkling eða lambakjöt á milli. Um daginn var ég með fermingarveislu og bauð upp á litlar tortillur með hægelduðu grísakjöti. Ég undirbjó allt daginn áður nema grísakjötið hægeldaðist yfir nóttina. Möguleikarnir eru margir og svo er líka alveg upplagt að nota kjötafganga til að setja á milli.
Forvinnsla
Ef tortillurnar eru heimabakaðar má búa þær til daginn áður, setja þær í plastpoka og reyna að lofttæma hann. Geyma í kæli yfir nótt. Upplagt að búa chilimæjó til daginn áður eða jafnvel nokkrum dögum áður.
Hráefni
Litlar tortillur u.þ.b. 20 stykki – ath. uppskriftina má auðveldlega helminga og þá ætti hún að duga fyrir 3 – 5
- 4 dl hveiti
- 2 dl heilhveiti
- 1½ tsk lyftiduft
- 1 tsk salt
- 2 msk olía
- 2¾ dl volg mjólk
Tillaga 1
- Litlar tortillur
- Heimagert chilimæjó
- Rauðkál – skorið í mjög þunnar sneiðar
- Lime – skorið í báta
- Salsa
- Hægeldað grísakjöt
Tillaga 2
- Heimagert chilimæjó
- Avókadósósa
- Hvítkál – skorið í þunnar sneiðar
- Salsa
- Litlar tortillur
- Kjöt eins og t.d. kindalundir, lambalundir eða kjúklingur
- Lime – skorið í báta
Verklýsing
Tortillur
- Þurrefnum blandað saman í skál. Olíu og volgri mjólk hellt yfir – lítið í einu og blandað saman þannig að úr verði deig. Sett á borð og hnoðað í nokkrar mínútur – raktur klútur lagður yfir – látið jafna sig í 20 mínútur
- Deiginu skipt í 20 – 24 jafna hluta. Bollur mótaðar, rakur klútur lagður yfir og látið jafna sig í 10 mínútur
- Hver bolla flött út eða sett í pressutæki (best að hafa klút yfir bollunum á meðan verið er að fletja út). Kökurnar bakaðar jafnóðum. Einnig er hægt að setja þær inn í raka klútinn eða plastpoka og leggja plastfilmu/bökunarpappír á milli. Kökurnar bakaðar á heitri pönnu eða grilli í u.þ.b. ½ mínútu á hvorri hlið. Ath. að kökurnar eiga það til að skreppa svolítið saman þegar þær eru settar á pönnuna
- Ef borða á kökurnar strax eru þær settar inn í rakan klút/viskustykki – annars verða þær harðar. Gott að halda þeim volgum með því að setja álpappír yfir eða setja þær í pott og geyma í ofninum á mjög lágum hita. Ef borða á tortillurnar síðar er best að setja þær nýbakaðar í plastpoka – reyna að ná öllu lofti úr og loka plastpokanum vel en þannig haldast kökurnar mjúkar og góðar fram á næsta dag
- Tortillur hitaðar – ef hita þarf margar í einu er gott að setja þær í rakt viskustykki ofan í pott og hita þær í ofninum á u.þ.b. 80°C – getur tekið nokkra stund en þá eru þær allar jafnheitar
Tillaga 1
- Í tortillurnar er fyrst sett rauðkál, síðan kjötið, salsað og að lokum er chilimajó sprautað yfir
- Punkturinn yfir i-ið er svo að kreista yfir úr lime
Tillaga 2
- Lambakjötið er piprað og steikt (kjúklingur kryddaður og steiktur)
- Í tortillurnar er fyrst sett hvítkál, síðan kjötsneiðar, salsað og að lokum er chilimajó og avókadósósu sprautað yfir
Tortillur bakaðar
Gott að velgja tortillurnar í potti (með viskustykki) á lágum hita í ofni
Tortillur með hægelduðu svínakjöti
Fylling: rauðkál, salsa, hægeldað svínakjöt og chilimajó
Tortilla með lambakjöti
Lambakjöt grillað og skorið í þunnar sneiðar
Fylling: hvítkál, salsa, lambakjöt, chilimajó, avókadósósa og mangósalsa
