Chilimæjó - Chilimajónes
Uppruni
Chilimajónes á vel við mexikóskan mat en það er einnig gott með ýmsum öðrum réttum. Best að kaupa ferskt chili, hengja það út í glugga og láta það þorna aðeins – getur tekið nokkra daga. Stundum næ ég ekki að láta það þorna nægilega vel en það hefur ekki komið að sök.
Hráefni
- 2 – 3 þurrkuð eða hálfþurrkuð chili (mega líka vera fersk)
- 2 – 3 dl vatn
- 1 msk olía
- 1 – 2 tsk paprikuduft
- 1 tsk tómatpúrra
- Ögn af cayennepipar
- 2 dl majones
- 1 dl sýrður rjómi
- ½ – 1 tsk oreganó
- Salt
Verklýsing
- Chili sett á heita pönnu – látið vera þar í 3 – 4 mínútur og snúið við reglulega
- Vatni hellt yfir og látið sjóða í 5 – 6 mínútur undir loki
- Chili tekið upp úr og látið kólna. Ekki henda vatninu – það má nota í pottrétti eða sósur
- Stilkar teknir af og chili fræhreinsuð – söxuð eða sett í matvinnsluvél
- Olíu, paprikudufti, tómatpúrru og cayennepipar blandað saman við chilimaukið
- Majonesi og sýrðum rjóma bætt við smám saman
- Kryddað með oreganó og salti
Geymsla: Geymist mjög vel í kæli.