Sterk útgáfa af hægelduðu grísakjöti - pulled pork
Uppruni
Fyrir nokkru áskotnaðist mér kokkabók með ýmsum taco uppskriftum og hef ég verið að prófa mig áfram með þær. Þar með er útgáfa af hægelduðu grísakjöti. Meðlætið getur verið tortillur, hamborgarabrauð eða bara eitthvað sem hverjum og einum dettur í hug. Best að kaupa ferskt chili og láta það hanga aðeins – það getur tekið nokkra daga. Ég hef ekki alltaf náð að láta það þorna nægilega en það hefur ekki komið að sök.
Frábær réttur og þægilegur – bara eitt sem er nauðsynlegt…. vera skipulagður og byrja undirbúninginn tveimur sólarhringum áður en maturinn er framreiddur.
Forvinnsla
Kryddblönduna má laga löngu áður og sama má segja um chilimaukið og barbecuesósuna. Þegar kjötið er sett í löginn má búa barbecuesósuna til eða jafnvel fyrr þar sem hún geymist vel í kæli.
Hráefni
Kjöt
- Rúmlega 3 kg svínahnakki (eða svína innralæri)
- Stór steikarpoki
Lögur/pækill
- 2 dl síróp
- 1½ dl salt
- 2 lítrar heitt vatn
Kryddblanda
- 2 msk reykt paprikuduft
- 1 msk cumin
- 2 tsk fennel fræ
- 1 msk kóríander
- 2 – 3 hvítlauksrif
- 1 tsk cayennepipar
- 2 tsk salt
- 1 tsk mulinn svartur pipar
- 1 msk chiliduft
Barbiquesósa
- 2 stk chili (það er allt í lagi þó að það sé ekki alveg þurrt)
- 1 gulur laukur
- 1 hvítlauksrif
- 1 gulrót
- 1 sellerístilkur
- ½ dl olía
- ½ dl muscovado sykur (dökkur)
- 2 tsk reykt paprikuduft
- 1 dl tómatpúrra
- 5 litlir tómatar – skornir í bita
- 1½ msk worcestersósa
- ½ dl balsamik edik
- Vatn af chilimaukinu (sjá 7. í Barbecusesósa)
- ½ – 1 msk reykt whisky (má sleppa)
- Salt og pipar
Hugmyndir að meðlæti
- Heimagert chilimajó
- Rauðkál – skorið í þunnar sneiðar
- Lime – skorið í báta
- Salsa – Heimagert salsa
- Salat og grænmeti
- Avókadósósa
- Tortillur – Heimagerðar tortillur
- Hamborgarabrauð – Heimagerð hamborgarabrauð
Verklýsing
Lögur
- Allt sett í pott og hrært þar til sírópið og saltið er leyst upp (gott að hafa aðeins hita á hellunni). Látið kólna. Kjötið sett í steikarpoka og blöndunni hellt í pokann – reyna að ná öllu lofti úr og pokanum lokað. Látið standa í kæli 12 -14 klukkustundir
Kryddblanda
- Öllu blandað saman og maukað í matvinnsluvél
Barbecuesósa
- Chili sett á heita pönnu – látið vera þar í 3 – 4 mínútur og snúið við reglulega svo það brenni ekki
- Vatni hellt yfir (2 – 3 dl) og látið sjóða í 5 – 6 mínútur með loki yfir
- Chili tekið upp úr og látið kólna. Ekki henda vatninu – það má nota í pottrétti eða sósur. Ég hef oft notað það til að þynna sósuna
- Stilkar teknir af og chili fræhreinsuð. Chili saxað mjög smátt eða sett í matvinnsluvél – lagt til hliðar
- Laukur, hvítlaukur, gulrót og sellerí sett í matvinnsluvél og maukað aðeins
- Olía sett í pott og blöndunni hellt út í. Steikt á meðalhita þar til laukurinn og selleríið verður glansandi – gott að hræra reglulega
- Muscaovado sykur, paprikuduft og tómatpúrra sett út í og hitinn hækkaður í nokkrar mínútur
- Tómötum bætt við ásamt worcestersósu, balsamediki, chilisoðinu og aðeins af whisky (má sleppa) – látið sjóða í 30 mínútur. Hræra í öðru hvoru – ef blandan er of þurr er gott að setja aðeins meira af chilisoðinu eða bara aðeins vatn
- Maukað með töfrasprota, kryddað með salti og pipar og látið malla á meðalhita í 15 – 20 mínútur þar til blandan er orðin þykk
Steiking
- Kjötið tekið úr kæli og leginum hellt af. Þerrað með eldhúspappír – einnig gott að þurrka aðeins innan úr pokanum
- Kryddblöndunni makað á allt kjötið og það síðan sett aftur í steikarpokann
- Ofninn stilltur á 80°C og kjötið steikt í 12 – 16 klukkustundir
- Kjötið tekið úr pokanum og tætt í sundur með tveimur göfflum
- Ofninn hitaður í 200°C – barbecuesósu dreift yfir og kjötið grillað þar til kominn er fallegur litur
Kryddblanda
Lögur/pækill
Barbiquesósa
Steiking
