Má ekki elska svona semlu?

Bleikar bolludagsbollur - semlur

Servings: Magn: 24 bollur
Time: 1½ klukkustund
Difficulty: meðal
Prenta

Uppruni

Hér kemur ný heimagerð útgáfa af semlu sem er bæði falleg og góð. Grunnuppskriftin kemur frá sænsku hefðbundnu semlunum hennar mömmu sem eru klárlega bestu bolludagsbollurnar. Þessi uppskrift hentar hins vegar betur fyrir þá sem eru minna fyrir marsipanið. Ef þið hafið ekki prófað að baka semlur áður … þá er algjörlega þess virði að gera það núna.

Ath. Það má alveg sleppa hindberjaglassúrnum og setja hvítt, brætt súkkulaði í staðinn. Einnig má sleppa báðum þessum valkostum og sigta bara flórsykur yfir.

Hráefni

Semlur

2½ dl mjólk
150 g smjör
1 egg – við stofuhita
1 bréf þurrger (12 g)
1 tsk steytt kardimomma – má sleppa
1 dl sykur
½ tsk salt
½ tsk hjartarsalt
9-10 dl hveiti
1 egg – til að pensla bollurnar

Rjómafylling

150 g hvítir súkkulaðidropar eða saxað, hvítt súkkulaði
5 dl rjómi
Rauður/bleikur matarlitur – má sleppa

Glassúr

½ – 1 dl frosin eða fersk hindber
2 – 4 dl flórsykur
Nokkrir dropar af sítrónusafa

Verklýsing

Semlur

Smjör brætt í potti
Mjólk hellt út í og blandan látin vera ylvolg þ.e. 37°C. Egginu bætt við. Ath. mér finnst ágæt regla að láta smjörið bráðna alveg á meðalhita (ekki alltof hratt) og næst að setja mjólkina út í – þá ætti hitastigið að vera í lagi (ekki hærra en 37°C). Ég set eggið svo út í blönduna til að fá jafnt hitastig á allt hráefnið sem er fljótandi
Ger, sykur, kardimomma, salt og hjartarsalt sett í hrærivélarskál. Mjólkursmjörblöndunni bætt við – ágætt að byrja á smá slurk og blanda öllu vel saman. Þá leystist þurrgerið örugglega vel upp
4 dl af hveitinu hrært saman við með sleikju. Afganginum af hveitinu bætt við og hnoðað (í vél eða í höndum)
Látið hefast í 10 mínútur – með klút yfir
Deiginu skipt í 4 parta og svo aftur hverjum parti skipt í tvennt. Hverjum parti skipt í 3 parta og bollur mótaðar með höndunum. Þannig verða bollurnar 24 – ef þið viljið hafa þær stærri má breyta skiptingunni
Sett á ofnplötu með bökunarpappír. Klútur (viskustykki) lagður yfir. Látið hefast í 1 klukkustund
Ofninn hitaður í 225°C (yfir- og undirhiti). Bollurnar penslaðar með hrærðu eggi og bakaðar í 7 – 9 mínútur

Rjómafylling

Rjóminn hitaður – potturinn tekinn af hellunni. Súkkulaðidroparnir settir út í og hrært saman þar til þeir hafa allir bráðnað. Sett í kæli í u.þ.b. 3 – 8 tíma eða þar til blandan er orðin köld
Við kælinguna getur myndast súkkulaðiskán. Þá blanda ég henni bara saman við með sleikju (getur orðið aðeins kornótt). Nokkrum dropum af matarlit bætt við og hrært (má sleppa)
Blandan þeytt vel saman – þannig að hún verði þykk eins og þeyttur rjómi

Glassúr

Ef hindberin eru frosin eru þau látin þiðna svo að hægt sé að ná safanum úr þeim (ef tíminn er naumur má gera það í potti eða örbylgjuofni). Berin sett í sigti og kornin sigtuð frá – gott að þrýsta aðeins á svo allur safinn renni úr. Tilvalið að setja aðeins af því sem eftir er í sigtinu á milli í bollurnar
Flórsykri og nokkrum dropum af sítrónusafa hrært saman við safann

Samsetning

Það má leika sér með það hvernig bollurnar eru skornar. Það má skera þríhyrning eða láta efri helmingin vera mun minni þannig að í báðum tilvikum er efri hlutinn eins og hattur – sjá myndir. Sumir taka jafnvel aðeins úr efri hlutanum þannig að hatturinn tolli betur (ekki nauðsynlegt). Svo má bara líka skera bollurnar í tvennt
Sumum finnst nóg að hafa sæta rjómann á milli en það er upplagt að nota hindberjakrapið úr sigtinu
Rjómafyllingin sett á milli eða sprautuð með rjómasprautu
Glassúr smurt á efri hlutann (á undan eða eftir). Svo er alltaf fallegt að strá aðeins af flórsykri yfir í lokin

Góð ráð við gerbakstur

Til þess að finna rétta hitastigið á blöndunni er ráð að dýfa olnboganum aðeins ofan í – ef sami hiti er á blöndunni þá er hitinn nálægt 37°C
Reynslan sýnir að af tvennu illu sé skárra að hafa mjólkurblönduna aðeins undir 37°C en yfir. Ef blandan er kaldari hægir það á hefingunni en of heit blanda getur eyðilagt hefinguna
Betra er að nota brauð- og pizzuhveiti við gerbakstur
Mikilvægt er að setja klút (viskustykki) ofan á skálina í hefingu. Betra er að hafa klútinn rakan eða spreyja yfir hann vatni úr spraybrúsa
Það skiptir máli að allt hráefnið sé við stofuhita. Kalt egg – beint úr ísskápnum – getur hægt á hefingu
Látið hefast á stað þar sem ekki er of svalt eða getur verið trekkur. Ekki hafa opna glugga nálægt deiginu eða hafa það nærri blæstri sem getur komið frá bakaraofninum. Ef sólin skín er tilvalið að láta hana skína á klútinn. Eins má nýta hita sem kemur frá ljósi eða ofni
Athugið að deig í hefingu þolir illa hreyfingu og hristing og er það best geymt á rólegum stað. Muna að pensla bollurnar varlega

Geymsla

Bollurnar eru bestar nýbakaðar og mjög fínar daginn eftir. Líka upplagt að setja þær í frystinn

Rjómafylling í vinnslu…sett í kæli eða látið standa úti