Ís með kókosbollum
Uppruni
Hér kemur ein auðveld uppskrift að ís … eina er að það þarf að eiga ísvél til að búa hann til. Concentreraða mjólkin gerir mikið fyrir ísinn en kostar því miður allt of mikið hér á Íslandi (hef keypt í útlöndum og tekið með mér heim… t.d. kostar hún brot af því, sem hún kostar hér, á Tenerife). Með því að nota concentreruðu mjólkina verður ísgerðin mjög auðveld og bragðið er gott… kemur þetta góða ísbragð.
Hráefni
- 1 dós concentreruð mjólk (325 g)
- 1 dós kókosmjólk eða kókosrjómi (350 – 400 ml)
- 1 dl kókosmjöl
- 6 kókosbollur – kramdar
- Má alveg kremja þessar tvær, sem eftir eru í pakkanum, ofan á ísinn
Verklýsing
- Concentreraða mjólkin, kókosmjólkin, mjölið og bollurnar sett í skál og blandað saman. Blandan sett í ísvélina sem er látin vinna í u.þ.b. 45 – 50 mínútur (svolítið mismunandi eftir vélum)
- Ísinn settur í ílát (má setja í Hönnupott í miðstærð sem tekur tæplega 1 líter) og kókosbollur kramdar yfir – einnig má skreyta með kókosmjöli
