Samloka með karrý kjúklingasalati
Uppruni
Fyrir nær 30 árum fékk ég svo góðar samlokur á Tryggvagötunni. Svo góðar fannst mér þær að ég hef oft hugsað um að reyna að gera eitthvað sambærilegt og …hér er mín útgáfa. Kjúllinn er eldaður í Hönnupotti eða sambærilegum potti (með loki sem þolir að fara í ofninn). Stundum nota ég afgang af kjúlla og skelli í salatið. Ferska salatið, kjúklingasalatið og prima pestó geymist allt vel í kæli og má því eiga tilbúið fyrir samlokugerðina.
Hráefni
Kjúklingasalat
- 2 úrbeinuð kjúklingalæri – krydduð t.d. með shawarma eða kjúklingakryddi – eldað í Hönnupotti eða lokuðu íláti í 180°C (blásturstilling) í 40 – 45 mínútur
- Ögn af safanum af kjúklingnum (ekki ef verið er að nota afganga)
- Tæplega 1 dl grísk jógúrt
- ½ dl majónes
- 1 tsk karrý
- 1 msk relish
- 1 msk – sæta eins og kurlaður/saxaður ananas gefur gott bragð
- Nokkrir dropar soja (má sleppa)
- Salt og pipar
Hvítkálssalat
- Hvítkál og/eða rauðkál – skorið fínt
- Gulrætur – rifnar
- Nokkrir dropar af sítrónu og/eða eplaediki
Hugmyndir í samlokugerðina
- Heimilisbrauð eða eitthvað sambærilegt
- Prima pestó
- Hrásalat og annað salat
Verklýsing
Kjúklingasalat
- Ofninn hitaður í 180°C (blástur)
- Kjúklingur kryddaður á báðum hliðum og settur í pottinn. Lokið sett á og eldað í 45 mínútur. Kjúklingur látinn kólna
- Grískri jógúrt, majónesi, karrý, relish og ananaskurli blandað saman í skál ásamt ögn af soðinu af kjúklingnum
- Kjúklingur skorinn niður og honum blandað saman við. Saltað og piprað
- Hvítkáli/rauðkáli, gulrótum og ediki/sítrónusafa blandað saman
Samlokugerð og meðlæti
- Brauð ristað og prima pestó smurt á hvora hlið
- Salat og kjúklingasalat sett á lokuna – fallegt að skera samlokuna í tvennt
Hugmynd fyrir veisluna:
Hægt er að skera hringi (ca 4 stk) úr brauðsneið (sem búið er að rista) og útbúa litlar samlokur – sjá mynd fyrir neðan. Það er allt í góðu að búa litlu samlokurnar til eitthvað áður – þær þola alveg að standa aðeins
Þá er upplagt að búa til rasp úr afskurðinum
Kúffull skál af kjúklingasalati
Hugmyndir fyrir veisluna….