Rúlluterta með möndlum og ferskum berjum
Uppruni
Uppskriftin kemur frá mömmu en þessi rúlluterta á sérstaklega vel við þegar berjauppskeran stendur sem hæst. Hindberin eru á svipuðum tíma og bláberin og rifsberin þannig að kakan er án efa terta ágústmánaðar. Hún er sérstaklega fljótleg og þægileg í bakstri.
Hráefni
Botn
- 50 g hnetu- eða möndluflögur – ristaðar á þurri pönnu
- 5 eggjahvítur
- 25 g sykur
- 5 eggjarauður
- 125 g sykur
- 1 tsk vanilludropar
- 80 g kransakökumassi
- 3 msk hveiti
Fylling
- 2½ – 3 dl rjómi
- 200 g hindber eða önnur ber
Verklýsing
Botn
- Ofninn hitaður í 200°C
- Möndlur/hnetur ristaðar á pönnu
- Eggjahvítur stífþeyttar og sykri (25 g) bætt við og þeytt í 3 mínútur til viðbótar. Geymt í kæli
- Eggjarauður hvítþeyttar ásamt sykri (125 g). Vanilludropum bætt út í
- Kransakökumassa og hveiti blandað saman – bætt við eggjaþeytuna
- Eggjahvítunum hrært varlega saman við blönduna – fyrst hluta af þeim og svo afganginum
- Bökunarpappír settur á botn í ofnskúffu og hann smurður með olíu
- Ristaðar flögur settar ofan á og deiginu hellt yfir
- Bakað í 10-12 mínútur
- Hvolft á bökunarpappír sem sykri hefur verið dreift á
- Hvolft aftur þannig að möndluhliðin snúi út þegar botninum er rúllað upp
- Látið kólna
Fylling
- Rjómi þeyttur og smurður yfir botninn
- Ferskum berjum dreift yfir rjómann – hluti geymdur til skreytingar
- Botni rúllað saman og sigtuðum flórsykri stráð yfir – skreytt með berjum og myntu
Útgáfa af berjarúllutertu
