Snúðar sem hitta í hjartastað...

Snúðahjarta með hindberjum og hvítu súkkulaði

Servings: Magn: 18 snúðar
Time: 2 klukkustundir
Difficulty: meðal
Prenta

Uppruni

Enn og aftur kemur ein snúðauppskriftin… mér finnst bara svo gaman að leika mér með nýjar útgáfur og ný form. Að þessu sinni er það hjartafom en það má líka rúlla upp í einn stóran snúð og baka í leirpotti eða baka 18 aðskilda snúða. En það má klárlega gleðja einhvern með einum hjartasnúði.

Forvinna

Upplagt að búa hindberjafyllinguna til fyrr um daginn eða daginn áður.

Hráefni

Deig

3 tsk þurrger
1 egg
3 dl mjólk
100 g smjör
½ dl sykur
1 tsk saltflögur
1 tsk kardimomma – steytt
8 – 9 dl hveiti

Fylling

50 g smjör
180 – 200 g frosin hindber
½ dl flórsykur
150 g hvítar súkkulaðiperlur
1 egg – til penslunar

Krem ofan á

¼ – ½ dl sigtuð/ósigtuð hindberjablanda
½ – 1 dl rjómaostur (má sleppa)
1 – 1½ dl flórsykur

Verklýsing

Smjör brætt í potti. Þegar smjörið er bráðnað er mjólkinni bætt við ásamt egginu og blandað saman (þá fæst oft mátulegur hiti (má alls ekki vera hærri en 37°C – sjá gerbakstur)
Þurrger, kardimomma og sykur sett í skál og skvettu af mjólkurblöndunni blandað saman við – hrært saman. Afgangi af mjólkurblöndunni bætt við ásamt hveiti – ágætt að setja 4 – 5 dl fyrst og hræra saman með sleikju
Afgangi af hveitinu ásamt salti blandað saman við og hnoðað. Klútur settur yfir og látið hefast þar sem lítill trekkur er í eina klukkustund (yfirleitt tvöfaldast deigið að stærð)
Fylling: Smjör brætt ásamt hvíta súkkulaðinu – blanda saman. Hindber og flórsykur maukað saman t.d. með töfrasprota. Sumir eru ekki hrifnir af kornunum í hindberjunum og þá má sigta þau frá. Sigtaður safi er u.þ.b. 2 dl – ágætt að taka tæplega ¼ – ½ dl frá í kremið (bara eftir því hvað maður vill hafa mikið krem). Það má alveg blanda saman bræddu hvítsúkkulaðinu saman við hindberjasafann
Deigið tekið úr skálinni og sett yfir hveitistráð borð. Flatt út með kökukefli þannig að það verði ca. 40×50 cm að stærð. Smjörblöndunni dreift yfir og síðan nær allri hindberjablöndunni (eða dreift sem einni blöndu) – ágætt að fara ekki alveg að brúnunum. Deigið rúllað upp og síðan er togað aðeins í endana þannig að rúllan verði jafnari
Rúllunni skipt í tvennt – síðan er hverjum helmingi skipt í þrjá hluta og svo hverjum þriðjungi í þrennt. Þetta verða 18 snúðar sem er raðað á smjörpappír. Hægt er að mynda hjarta, eitthvað annað eða hafa þá staka. Þegar verið er að skipta deiginu niður er gott að gera fyrst far með hnífnum og skera svo alveg niður þegar búið er að áætla stærð snúðanna – fyllingin getur aðeins lekið úr en það má bara dreifa því yfir snúðana eða setja það í kremið. Ath. ef myndað er hjarta eða eitthvað annað þannig að snúðarnir liggja þétt saman er gott að hafa smá bil á milli þar sem þeir stækka við bakstur
Ofninn hitaður í 215°C (yfir- og undirhiti) og klútur lagður yfir hjartað á meðan ofninn er að hitna
Þegar ofninn hefur náð hitanum er eggið pískað (hrært) og snúðurinn penslaður með því. Snúðurinn bakaður í 15 – 20 mínútur – fylgjast með síðustu mínúturnar svo hann verði ekki of dökkur. Snúðahjartað látið kólna
Krem ofan á: Flórsykri blandað saman við það sem eftir er af hindberjablöndunni. Rjómaosti bætt við og hrært saman þar til blandan verður slétt og fín. Flórsykur sigtaður yfir hjartað og hindberjakreminu hellt yfir hér og þar – gott að nota skeið eða gaffal til að dreifa úr því – má vera frjálslegt