Hver vill ekki svona kjúkling í leirpotti?
Uppruni
Karrýréttir hafa alltaf verið vinsælir hjá börnunum og skorað hátt hjá heimilisföðurnum. Það lá því beinast við að þróa karrý kjúklingarétt eldaðan í pottunum góðu. Það má alveg hafa réttinn aðeins sterkari eða daufari… bara eftir smekk hvers og eins. Það má líka alveg sleppa tómötunum í lokin en ótrúlegt en satt þá er það húsbóndinn sem ber ábyrgð á þeim. Fín uppskrift og því alveg gráupplagt að halda hlutföllunum á hreinu hér.
Hráefni
- 1 bakki úrbeinuð kjúklingalæri
- Krydd eins og t.d. Best á allt, eðal kjúkingakrydd, shawarma og/eða Miðausturlönd
- Niðurskorið grænmeti – t.d. gulrætur, blómkál og/eða spergilkál – skorið í bita
- Olía til steikingar
- ½ – 1 laukur – skorinn smátt
- 3 – 4 hvítlauksrif – pressuð
- 150 – 200 ml kjúklingasoð (u.þ.b. 1½ – 2 tsk kjúklingakraftur)
- 1 ferna kókosmjólk (250 ml)
- ½ tsk cayenna pipar (ef þú vilt hafa þetta sterkt)
- ½ tsk chilliflögur
- 2 dl matreiðslurjómi
- 1 msk sojasósa – má sleppa
- 1 – 1½ msk karrý
- 1 msk mangó chutney
- 2 – 4 msk sósujafnari
- 4 – 8 litlir ferskir tómatar – skornir í bita
- Ferskt koríander eða steinselja – má sleppa
- Salt og pipar
Verklýsing
- Ofninn hitaður 180°C – blástur
- Kjúklingalæri krydduð og þeim raðað í pottinn – ekki raða þeim ofan á hvert annað (þá getur eldunartíminn lengst)
- Potturinn settur inn í ofn í 30 mínútur – með lokinu á
- Á meðan kjúklingalærin eru að eldast í ofninum er sósan búin til. Pannan hituð með smá olíu – laukur og hvítlaukur steiktir á lágum hita í u.þ.b. 5 mínútur – karrý, chilliflögum og cayenna pipar bætt við (ef rétturinn á að rífa aðeins í)
- Ef gulrætur eru í réttinum er betra að sjóða þær fyrst í vatni í 3 – 4 mínútur. Vatnið sigtað frá og gulræturnar settar á pönnuna – hrært
- Kjúklingasoði hellt á pönnuna ásamt kókosmjólk og matreiðslurjóma
- Mangó chutney og sojasósu bætt við ásamt sósujafnara. Nú er suðan látin koma upp – sósan má vera smá þykk þar sem hún þynnist þegar hún blandast við vökvann í pottinum
- Potturinn tekinn úr ofninum eftir 30 mínútur – spergilkáli og/eða blómkálsbitum dreift yfir kjúllann. Sósunni hellt yfir allt – sett aftur inn í ofninn með lokinu á í 15-20 mínútur. Gott að taka lokið af síðustu 5 mínúturnar
- Rétt áður en rétturinn er borinn fram er tómatbitum dreift yfir ásamt niðurklipptri steinselju/kóríander (má sleppa)
Meðlæti:
Soðin hrísgrjón og salat.
Kjúlli fyrir og eftir steikingu í ofni
Sósan útbúin
Tilbúinn í ofninn
Beint úr ofninum
Hér er notað frosið blómkál og spergilkál (þiðnuðu í heitu vatni á meðan sósan var útbúin)
