Ljúffeng kjúklingasúpa með karrýi og hrísgrjónum
Uppruni
Uppskriftin kemur úr sænsku blaði eins og svo margar aðrar. Þessi súpa er allt í senn sérstaklega góð, barnvæn og auðveld. Upplagt að hafa hana í matinn ef til er afgangur af hrísgrjónum eða kjúklingi.
Forvinna
Gott að eiga soðin hrísgrjón og eldaðan kjúkling.
Hráefni
- 300 g kjúklingabringur eða lundir
- Rúmlega 2 dl soðin hrísgrjón
- 1 laukur – saxaður smátt
- 1 msk karrý
- 2 msk smjör – til steikingar
- 2 msk hveiti
- 12 dl kjúklingasoð – heitt vatn og kjúklingakraftur (sjá hlutföll á umbúðum)
- 2 dl matreiðslurjómi
- ½ dl mango chutney
- ½ tsk salt
- 2 dl frosið brokkolí (grænar baunir eða annað grænmeti)
- Ögn af cayennepipar
- 1 grænt epli – rifið fínt (með hýði)
- ½ dl graslaukur – saxaður
Verklýsing
- Kjúklingur steiktur á pönnu á meðan súpan er elduð. Ég á það til að ofsteikja kjúkling en bringur steiki ég í 15 – 18 mínútur og lundir í 10 mínútur. Það er í lagi í þessum rétti að kjötið sé aðeins ofeldað en þá er það ekki eins safaríkt
- Ef ekki eru til soðin hrísgrjón eru þau soðin á meðan súpan er í vinnslu
- Smjör sett í pott og látið bráðna á vægum hita. Laukur og karrý steikt í smjörinu í 3 – 5 mínútur – áfram vægur hiti
- Hveiti stráð yfir – aðeins hitað
- Heitu vatni hellt yfir og hrært – kjúklingakraftur settur út í. Hrært saman
- Rjóma og frosnu brokkolí bætt við og súpan látin malla í 10 mínútur án loks
- Mango chutney og krydd sett út í
- Kjúklingur skorinn í litla strimla – tættur í strimla
- Graslauk og rifnu epli blandað saman í skál
- Hrísgrjón sett í botn á súpuskál og súpu hellt yfir. Kjúklingastrimlum dreift yfir og eplagraslauksblandan sett yfir í lokin
