Hamborgarhryggur með rauðvínssósu
Uppruni
Þessa uppskrift hef ég notað undanfarin 15 ár eða frá því að ég byrjaði að halda mín eigin jól. Uppskriftin er í bókinni Hátíðaréttir sem kom út fyrir mörgum árum. Stundum myndi ég vilja hafa eitthvað annað í matinn á aðfangadagskvöld en þar er ég í algjörum minnihluta á heimilinu. Kosturinn er sá að það er tiltölulega þægilegt að matreiða þennan rétt og er hann mjög vinsæll þegar borða á afganga en þá er höfð bearneaissósa með.
Hráefni
- 3 kg hamborgarhryggur
- 2 dl tómatsósa
- 2 msk Dijon-sinnep
- 2 msk rjómi
- 2 dl kók (Coke)
- 1 dl rauðvín
- 1 dl sykur
Sósa
- 3 msk smjör
- 3 msk hveiti
- 5 dl kjötsoð (5 dl heitt vatn og 1 svínakjötstengingur – sjá leiðbeiningar á umbúðum)
- 1 dl rauðvín
Verklýsing
- Hamborgarhryggur er soðinn í stórum potti inni í ofni eða á hellu. Athuga að vatnið má alls ekki bullsjóða heldur er betra að láta hrygginn sjóða á vægum hita. Kjöthitamæli stungið í mitt kjötið en ekki alveg inn að beini. Soðið þar til mælirinn sýnir 70°C. Ef kjötið er soðið í ofni er hann hitaður í 180°C og vatn látið ná eins vel yfir kjötið og hægt er – lok sett yfir
- Þegar kjötið hefur náð 70°C er vatninu hellt af og gljáinn útbúinn
- Tómatsósa, sinnep, rjómi, kók og rauðvín hrært saman
- Sykurinn hitaður á pönnu – þar til hann bráðnar. Gæta þess að hann brenni ekki. Rauðvínsblandan hrærð saman við – sykurinn harðnar í fyrstu en þegar hrært er áfram á pönnunni þá blandast hann saman við
- Ofninn hitaður í 200°C. Hryggurinn settur í ofnskúffu og penslaður með gljáanum – nokkrum sinnum þar til að kominn er fallegur litur á hrygginn. Gæta þess að hryggurinn brenni ekki – mikilvægt að fylgjast vel með og setja álpappír á ef hann er að brenna
Sósa
- Smjör brætt í potti og hveiti hrært saman við
- Kjötsoðinu hellt smám saman út í og hrært stöðugt í. Bragðbætt með rauðvíni
Meðlæti
Brúnaðar kartöflur, rauðkáli, Waldorfsalat og soðið grænmeti.
Hamborgarahryggur soðin í stórum potti í ofni eða á pönnu
Hamborgarahryggur nýkominn úr pottinum og næsta skref að pennsla með gjláanum
Gljáinn í vinnslu