Sykurbrúnaðar kartöflur
Uppruni
Einu sinni á ári brúna ég kartöflur og það er á aðfangadag. Þá man ég aldrei hvernig það er gert og enn síður man ég hlutföllin. Það er því best að setja þetta inn hérna.
Forvinna
Gott að sjóða kartöflurnar á undan og nú orðið flysja ég þær áður en ég set þær í pottinn þar sem þær verða bæði miklu fallegri og auk þess er það tímanlega hagkvæmt.
Hráefni
- 1 kg kartöflur – fallegra að hafa þær litlar
- 50 g smjör
- ¾ dl sykur
- Fersk persilja – má sleppa
Verklýsing
- Kartöflur flysjaðar og soðnar í léttsöltu vatni í u.þ.b. 20 mínútur – ágætt að nota prjón til að kanna hvort þær eru soðnar
- Sykurinn látinn bráðna á pönnunni og smjörinu síðan bætt við
- Þegar smjörið hefur bráðnað og blandast við sykurinn (að mestu leyti) eru kartöflurnar settar út í og þeim velt upp úr sykurbráðinni
- Það er allt í lagi að láta kartöflurnar malla aðeins á pönnunni á lágum hita með loki yfir – bara ekki of lengi
- Mér finnst gott að strá smá saxaðri steinselju yfir kartöflurnar í lokin
Á vel við
Ýmsan veislumat eins og hamborgarhrygg.