Kjötsúpan góða - uppáhaldið hans Huga
Uppruni
Þegar hann Hugi hélt upp á 9 ára afmælið sitt fékk hann að velja matseðilinn og var kjötsúpa efst á óskalistanum þó að varla væri farið að hausta. Hann réð ömmu sína í verkið og tókst vel til. Greinilegt að börnin eru búin að fá nóg af pizzum í afmælum og hafa þau oft beðið um allt annað eins og hakk og spagetti og kjötsúpu. Það er misjafnt hvað sett er í súpuna – ömmur hans Huga setja alls ekki það sama en honum finnst þær báðar svo góðar. Ákvað að blanda uppskriftum þeirra saman – það ætti ekki að klikka!
Forvinna
Súpuna er hægt að gera daginn áður og er hún jafnvel betri þannig.
Hráefni
- 1 kg lambakjöt – ca 4-5 fallegar frampartssneiðar
- U.þ.b. 500 g rófur – afhýddar og skornar í stóra bita
- U.þ.b. 300 g gulrætur – afhýddar, ef með þarf, og skornar í bita
- U.þ.b. 250 g kartöflur – afhýddar og skornar í tvennt
- 1 blaðlaukur (má sleppa) – skorinn í sneiðar
- 1 stilka sellerí ( má sleppa) – skorin í þunnar sneiðar
- 1 laukur (má sleppa) – skorinn í sneiðar
- 1 dl hrísgrjón (má sleppa)
- 60 g súpujurtir – ef mikið er sett af fersku grænmeti þarf minna af súpujurtum
- Salt og e.t.v. timjan
Verklýsing
- Kjötið snyrt og sett í súpupottinn. Vatn látið fljóta yfir. Staðið við pottinn þangað til suðan kemur upp – froðan fleytt ofan af
- Soðið í u.þ.b. 30 mínútur við vægan hita (ekki bullsjóða)
- Allt grænmetið, hrísgrjón og krydd sett í pottinn og látið sjóða með kjötinu við vægan hita í 30 mínútur. Rófurnar þurfa aðeins lengir suðu – það má því skella þeim í aðeins á undan. Vatni og salti bætt við eftir þörfum
- Kjötið veitt upp úr súpunni, látið kólna aðeins og skorið niður í litla bita (skemmtilegra þegar borið er fram en ekki nauðsynlegt). Sett út í súpuna aftur – hitað aðeins og súpan er tilbúin
