Heimagert pasta er best

Uppruni

Fyrir nokkrum árum fékk ég pastavél að gjöf frá börnunum mínum.  Eitthvað miklaði ég þetta fyrir mér og því hafa græjurnar dúsað ónotaðar uppi í skáp … þar til fyrir nokkrum vikum að ég ákvað að byrja og nú er ekki aftur snúið.  Heimagert pasta er klárlega það allra besta og ekki spillir fyrir að það er mun ódýrara en að kaupa það ferskt.  Möguleikarnir eru óteljandi … tagliatelle, spagetti, lasagnaplötur og ravioli með mismunandi fyllingum.  Pastagerð er líka ákveðin samvera og ef það er einhverntíma hægt að virkja börnin þá er það í þessu.  Það tók mig nokkur skipti að fá tilfinninguna hvernig deigið er best… verra að hafa það of blautt og líka að hafa það of þurrt en það þarf ekki mörg skipti til að ná tökum á því að búa til sitt eigið pasta.

Gott að hafa í huga 

• Egg geta verið misstór og því er vökvamagnið aðeins breytilegt.  Þá er betra að byrja með rúmlega helming af hveitinu og bæta svo við.  Það er verra að vinna með deigið ef það er of þurrt
• Sumir setja aðeins af olíu með egginu í byrjun og hnoða saman við.  Ég set smá í byrjun og svo aftur smá þegar ég er að hnoða deigið
• Sagan segir að alltaf eigi að hnoða pasta á trébretti. Hitastigið gæti verið ástæðan þar sem það er kaldara að hnoða deigið á steini.  Hef prófað bæði og ekki fundið mikinn mun
• Deigið þarf að hnoða í 10 mínútur.  Athuga að þetta er mjög mikilvægt.  Ef þú gefur þér tíma í að hnoða deigið færðu viðráðanlegra deig
• Það er þessi góði millivegur sem virkar best… ekki of blautt og ekki of þurrt.  Ef deigið er aðeins of blautt er lítið mál að hafa hveiti við höndina (eða blöndu af durumhveiti og hveiti) og nota ögn af því ef deigið loðir of mikið við.  Ef deigið er of þurrt má bæta ögn af olíu saman við og hnoða aðeins
• Skv. uppskriftum er þrískiptingin notuð … gera þrefalt lag (svipað og með súrdeigsbrauðið – sjá myndir) og renna því í gegn.. þrisvar á þykkustu stillingunni. Ég geri nú yfirleitt einu sinni og renni því kannski tvisvar í gegnum þykkustu stillinguna.  Ef lengjan er orðin of breið þá er ráð að leggja hana saman langsum og renna henni síðan í gegnum breiðustu stillinguna. Svo minnka ég um einn í hvert skipti þar til búið er að renna í gegnum þynnstu stillinguna
• Hægt er að margfalda uppskriftina – ég hef gert alveg upp í tífalda uppskrift í einu en þá þarf bara að passa að holan sé nægilega stór fyrir öll eggin
• Það má gera ráð fyrir að ein uppskrift dugi fyrir 1 – 2
• Ef verið er að gera margfalda uppskrift og skipta þarf deiginu í nokkra parta er mjög mikilvægt að hafa plastfilmu á þeim bitum sem bíða eftir að fara í gegnum pastavélina
• Einnig er gott að setja afskurðinn undir plast svo hann þorni ekki… þá er auðveldlega hægt að skella því í góða kúlu og fletja aftur út

Geymsla:  Pastadeig má geyma í  2 – 3 daga í kæli