Melanzane alla parmigiana... svo gott

Djúpsteikt eggaldin með tómötum og mozzarella

Servings: 3-4
Time: 2 klukkustundir
Difficulty: meðal
Prenta

Uppruni

Þessi réttur er í uppáhaldi hjá Dagnýju vinkonu minni og var það að ósk hennar sem við fengum kennslu í að búa hann til á matreiðslunámskeiðinu í Flórens hér um árið. Það hefur verið lengi á dagskrá að setja inn uppskriftina … en þar sem heimilisfólkið átti erfitt með að sannfærast um ágæti réttarins varð hann alltaf undir. En viti menn svo kemur í ljós að hann þykir bara nokkuð góður. Það má mæla með þessum rétti … sérstaklega fyrir þá sem eru grænir og vænir… en líka hina.

Ath. Það er smekksatriðið hversu mikið af eggaldinsneiðum á að vera í hverju lagi – þeir sem vilja hafa mjög mikið af þeim ættu að nota 3 eggaldin í uppskriftina

Hráefni

2 – 3 meðalstór eggaldin – skorin í þunnar sneiðar (langsum eða þversum)
40 g hveiti – sett á disk
400 g sólblómaolía
500 g tómatar (niðursoðnir eða ferskir – gott að nota tómata sem liggja undir skemmdum)
200 g mozzarella ostur – aðeins kreistur og skorinn í smá bita
Ólífuolía
Salt
10 – 15 basillauf – söxuð. Einnig má nota þurrkað basil
2 – 4 hvítlauksrif – söxuð
Parmesanostur – rifinn fínt

Verklýsing

Eggaldinsneiðunum velt létt upp úr hveitinu (ágætt að dusta hveitið aðeins af sneiðunum – þá verður það síður eftir í olíunni þegar þær eru steiktar)
Olía sett í djúpa pönnu eða pott og hituð – gott að stinga hitamæli í olíuna til að sjá hvenær réttu hitastigi er náð þ.e. 180° – 200°C. Eggaldinsneiðarnar steiktar á báðum hliðum. Ath. olían þarf alls ekki að vera svo mikil bara þannig að sneiðarnar nái að steikjast vel. Þær eru tilbúnar þegar þær hafa náð gulbrúnum lit. Lagðar á eldhúspappír og salti stráð yfir. Ath. Í stað þess að djúpsteikja má setja sneiðarnar á grillið en þá er betra að pennsla sneiðarnar með olíu svo þær festist síður við
Sósa: Saxaður hvítlaukur settur ofan í heita pönnu eða pott með olíu í – hrært. Tómötum og hluta af basil bætt við – látið malla í 15 mínútur
Ofninn hitaður í 180°C
Samsetning: Fyrst er lag af tómatamauki sett í eldfast fat (eða í Hönnupott, má setja bæði í efri og neðri hlutann). Næst er eggaldinsneiðum dreift yfir og svo mozzarellabitum. Að lokum er parmesanosti stráð yfir. Svo aftur.. tómatamauk, eggaldin, mozzarella, parmesan…þegar 3 – 4 lög af eggaldini eru komin er endað með tómatamauki og parmesanosti. Ath. það er svolítið smekksatriði hversu margar eggaldinsneiðar eru settar í hvert lag… þær geta alveg verið mjög þétt saman
Bakað í ofni í 20 – 25 mínútur