Falleg í eftirrétt eða á veisluborðið
Uppruni
Þennan fallega og góða eftirrétt má búa til daginn fyrir veisluna/afmælið. Best að bíða með berin og skrautið og setja það á samdægurs. Fjöldi skála er smekksatriðið – þær geta verið frá 1 stórri skál upp í 20 litlar – fer allt eftir því hvort um er að ræða smárétt á veisluborðið eða eftirrétt. Það getur t.d. verið fallegt að setja í 6 skálar og bera fram sem eftirrétt eða hafa eina stóra skál þannig að hver og einn geti ákveðið magnið. Hér á ferð er frískandi, fallegur og léttur eftirréttur.
Hráefni
- 150 g hvítt súkkulaði – saxað eða dropar frá Nóa Síríus
- ½ + 2½ dl rjómi
- 2 eggjarauður
- ½ msk flórsykur
- ½ vanillustöng
- Ávextir: Ástaraldin /passionfruit, jarðarber eða hindber
Verklýsing
- ½ dl af rjóma settur í pott ásamt fræhreinsaðri vanillustöng – fræin og stöngin (½) sett í rjómann. Hitað að suðu – tekið af hitanum
- Vanillustöngin tekin upp úr pottinum og hvítu súkkulaðinu bætt við og hrært saman – látið kólna
- Rjóminn (2½ dl) þeyttur – lagður til hliðar. (Til að spara uppþvottinn má alveg nota sömu skálina (og þeytara) áfram til að þeyta eggjarauðurnar og flórsykurinn)
- Eggjarauður og flórsykur þeytt saman þar til blandan verður létt og ljós. Súkkulaðiblöndunni blandað varlega saman við með sleikju og síðan þeytta rjómanum
- Hvítsúkkulaðimúsin sett í fallegar skálar (eina eða fleiri). Þægilegt að nota rjómasprautu með stórum stút við það. Látið vera í kæli í a.m.k 3 klukkustundir (mjög fínt að láta standa yfir nótt – þá er betra að setja plastfilmu yfir)
- Skreytt með ávöxtum eins og ástaraldinum, hindberjum og/eða jarðarberjum. Einnig er fallegt að skreyta með ferskri myntu eða öðru skrauti… bara um að gera að nota hugmyndaflugið
Réttinn má hafa í einni skál..