Algjör negla þegar tíminn er naumur
Uppruni
Rúllutertur eru eitt af því einfaldasta og fljótlegasta sem hægt er að baka… einfaldara en að fara í bakaríið. Mesta vinnan fer í að þvo upp en undirbúningurinn tekur 10 mínútur og bökunartíminn 5 mínútur. Eins og ég get aldrei sagt nógu oft … rúlluterta er létt í maga, fljótleg og falleg….. bara algjör negla.
Hráefni
Botn
- 3 egg
- 1½ dl sykur
- 1½ dl hveiti
- 1 dl kókosmjöl (½ í deigið og ½ á bökunarpappírinn)
- 1 tsk lyftiduft
- 1 tsk vanillusykur
- 1 msk vatn
Fylling
- 8 litlar kókosbollur
- 3 dl rjómi
- Ber eins og t.d. hindber – má sleppa
- Pistasíuhnetur – saxaðar – má sleppa
- Flórsykur
Verklýsing
- Ofninn hitaður í 250°C (yfir- og undirhiti)
- Egg og sykur hvítþeytt
- Hveiti, kókosmjöli, lyftidufti og vanillusykri blandað varlega saman við hvítþeytt eggin með sleikju – vatnið fer saman við í lokin
- Bökunarpappír settur í ofnskúffu – gott að smyrja pappírinn aðeins með hörðu smjöri
- Deiginu dreift yfir pappírinn (u.þ.b. 30×40 cm) og bakað í 5 mínútur – fylgjast með svo að kakan verði ekki of dökk
- Kökunni hvolft á annan bökunarpappír sem búið er að dreifa kókosmjöli á – hinn tekinn af og ofnskúffa lögð yfir – það er gert til þess að koma í veg fyrir að kakan harðni
Fylling
- Rjóminn þeyttur – muldum kókosbollum blandað saman við
- Ofnskúffan tekin af kökunni og kókosbollurjómanum smurt yfir. Hindberjum og söxuðum pistasíuhnetum stráð yfir (má sleppa)
- Kakan rúlluð upp – gott að nota bökunarpappírinn til að hjálpa við það. Rúllutertuna er hægt að bera fram heila á fallegu bretti/fati en einnig má skera hana í bita. Þá er fallegt að hver biti sé u.þ.b. 5 – 6 cm þykkur (láta skurðenda snúa upp) og skreyta með auka þeyttum rjóma, hindberjum, kókosmjöli og/eða pistasíukurli
Ekki gleyma… 1 msk af vatni
