Humarloka af einföldustu og bestu gerð
Uppruni
Í sumar fékk ég svo góða humarloku … hún var svo góð að ég gat ekki gleymt henni. Þar sem það gengur ekki upp að skreppa austur á Höfn til þess eins að gæða sér á humarloku var ekkert annað í stöðunni en að prófa sig áfram heima í eldhúsi. Ég baka Brioce hamborgarabrauð til að hafa með. Þessi einfalda og fljótlega hitaeiningabomba er mjög vinsæl á heimilinu… og hverrar hitaeiningar virði.
Forvinnsla
Gott að taka humarinn úr frysti daginn áður og láta hann þiðna í kæli yfir nótt. Ath. mjög sniðugt að setja humarinn í sigti og láta vökvann, sem rennur af, í krukku og inn í frystinn. Þá er til soð í humarsúpu, fennelrisotto eða fiskisúpuna.
Hráefni
- 150 g skelflettur humar á hverja loku (fæst t.d. í Fiska)
- hvítlauksrif – pressað – smekksatriði hversu mikinn hvítlauk fólk vill hafa
- Vel af smjöri
- Eðal hvítlaukssalt frá Pottagöldrum. Einnig er gott að blanda saman gulum sinnepsfræjum, kóriander fræjum, rósapipar og hvítlaukssalti
Meðlæti
- Brioce hamborgarabrauð – t.d. Bestu Brioce hamborgarabrauðin
- Kokteilsósa – t.d. heimagerð kokteilsósa
- Íssalat
Verklýsing
- Smjör brætt á pönnu og hvítlauki bætt við
- Hitinn hækkaður og humarinn snöggsteiktur og kryddaður – sjá myndband. Ath. ekki henda vökvanum sem kemur af – upplagt að setja í krukku og frysta til að eiga í t.d. fiskisúpuna
- Hamborgarabrauðin hituð… kokteilsósa sett á ásamt salati og humri
Meðlæti: Franskar eða kartöfluskífur/strimlar í ofni
Það er mjög gott að blanda saman sinnepsfræjum, kórianderfræjum og rósapipar og mylja aðeins í morteli. Hvítlaukssalti bætt svo saman við – ég nota u.þ.b. 1 tsk af hverju (fræjum og pipar) en 3 tsk af hvítlaukssalti þegar ég er með 1,5 kg af humri
