Prinsessuterta

Uppruni

Prinsessuterta er án efa í algjöru uppáhaldi. Hún er hvort tveggja í senn mikil prýði á veisluborðinu og einstaklega góð á bragðið. Uppskriftin kemur úr bók sem mamma hafði með sér frá Svíþjóð fyrir 40 árum. Kakan hefur verið gerð í ýmsum litum en upprunalegi liturinn er grænn með ljósbleiku skrauti. Hún er flókin við fyrstu kynni en verður auðveldari eftir nokkur skipti. Heba, dóttir mín, sér yfirleitt um skreytinguna.

Forvinna

Stundum hef ég bakað svampbotnana 1 – 2 dögum áður en kakan er sett saman. Það er hins vegar gert daginn áður en hún er skreytt þar sem kremið þarf að ná að stífna. Ég set hjúpmarsipanið á kökuna samdægurs eða daginn áður en hún er borin fram. Ef þarf að lita hjúpmarsipanið þá er gott að hafa dags fyrirvara á því og láta það jafna sig.

Botnar

1. Hita ofninn í 190°C á yfir- og undirhita (eða 180°C á blæstri)
2. Þeyta saman egg og sykur þar til blandan verður létt og ljós
3. Blanda saman hveiti og karöflumjöli (sigta saman). Blanda saman varlega með sleikju – betra að sigta hluta í einu ofan í eggjaþeytuna (þá blandast það betur við eggjaþeytuna). Blanda varlega saman með sleikju
4. Sett í 20 cm form (24 cm) – smurður smjörpappír settur í botninn – ekki smyrja hliðarnar
5. Baka í 30 mínútur – passa að brenni ekki (gott að setja álpappír yfir ef yfirborðið er orðið of dökkt)
6. Láta kólna í forminu – skorið í tvo botna (má líka baka í tveimur formum en þá er betra að baka báða botnana í einu á blæstri). Ágætt að láta botnana kólna í ofninum svo þeir falli síður

Krem

7. Setja matarlím í kalt vatn og láta liggja í 5 mínútur
8. Blanda saman matreiðslurjóma, eggjarauðum, sykri og maizenamjöli í pott og láta hitna – ekki of hratt og hræra stöðugt. Mikilvægt að láta ekki sjóða til að forðast kekki
9. Þegar kremið hefur þykknað er matarlímið látið ofan í (tekið upp úr vatninu og kreist) – hrært rólega
10. Kremið látið kólna – má ekki stífna. Gott að hræra í reglulega
11. Rjómi þeyttur ásamt vanillusykri. Þegar kremið er orðið nægilega kalt er rjómanum blandað saman við með sleikju

Samsetning

12. Gott að setja neðri svampbotninn í smelluformið sem hann var bakaður í. Allt kremið sett ofan á – ágætt að láta stífna aðeins (ekki nauðsynlegt). Þá er hinn svampbotninn settur ofan á. Best að láta kökuna standa í kæli yfir nótt (setja plastpoka yfir)

Skreyting

13. Þeyta rjóma og smyrja honum ofan á kökuna og aðeins á hliðarnar. Hafa vel af rjóma efst á brúnunum
14. Fletja út hjúpmarsipanið (getur verið púl) – gott að gera það á bökunarpappír með flórsykri yfir. Mæla hæðina á tertunni – tvöfalda þá tölu og bæta þvermálinu við 20 cm (24 cm). Fletja marsipanið þannig út að það nái að hylja alla tertuna
15. Hjúpurinn lagður yfir tertuna og skorið frá við botninn
16. Í lokin eru búnar til rósir eða snæri úr afganginum til að skreyta með
17. Kakan er geymd í kæli áður en hún er borin fram – athuga að setja ekki plastfilmu yfir hana. Kakan þolir vel að standa skreytt í kæli yfir nótt án þess að skemmast

Útfærslur

Í Svíþjóð eru til nokkrar útfærslur af þessari tertu. Oft er sett sulta á neðri botninn og á það vel við. Stundum eru sett nokkur fersk hindber í kremið eða rjómann en þá er sultunni sleppt. Enn ein útgáfan er þannig að kremið og rjóminn eru höfð aðskilin. Þá er kremið sett á annan hvorn botninn og síðan rjóminn á milli og ofan á. Sulta eftir smekk.

Geymsla

Kakan geymist í nokkra daga í kæli en er að sjálfsögðu best ný.