Marineraðir lambakonfektbitar
Uppruni
Þessi uppskrift er heimatilbúin. Við höfum stundum keypt marineraða lambakonfektbita en langaði að búa til okkar eigin marineringu. Hún hefur verið í þróun í nokkurn tíma og erum við ánægð með hana – best ef kjötið er látið liggja í nokkra daga í marineringunni. Ómarineraðir lambakonfektbitar eru yfirleitt ekki til í kjötborðinu en við höfum fengið þá í Fjarðarkaupum og þurft að biðja um að skera þá sérstaklega (gott að hringja og panta). Mæli með þessari uppskrift – hún þykir mjög góð.
Hráefni
- 1-1,2 kg lambakonfekt
Marinering
- 1 dl olífuolía
- ¼ – ½ dl púðursykur
- 1 – 2 msk sriracha hot chilisósa (minna ef ekki er smekkur fyrir smá sterku – sérstaklega ef kjötið er lengi í marineringu)
- ½ msk rautt curry paste
- ½ msk grænt curry paste
- 1 tsk dijon sinnep
- Rúmlega ¼ tsk malaður blandaður pipar
- 2 – 4 hvítlauksrif – pressaðir
- 1 tsk rifinn engifer
- 2 tsk rauðvínsedik
- 1 tsk Ítölsk hvítlauksblanda
- 1 tsk þurrkað oreganó
- 1 msk Herbs de Provence frá Pottagöldrum
- 2 msk söxuð fersk salvía eða 2 tsk þurrkuð
- Handfylli af ferskri persilju/steinselju – söxuð
Verklýsing
- Marinering: Öllu hráefni blandað saman í skál
- Lambakonfektið sett út í og látið marinerast í a.m.k. nokkrar klukkustundir (best í einn sólarhring – jafnvel í nokkra daga). Ef kjötið er aðeins í nokkrar klukkustundir í marineringunni er best að láta það standa úti (við stofuhita) en í kæli ef hún nær yfir lengri tíma
- Ef kjötið hefur verið geymt í kæli (í marineringunni) er gott að taka það út töluvert áður en það er steikt/grillað og láta það ná stofuhita
- Ofninn hitaður í 180°C ef kjötið er steikt á pönnu eða verið er að grilla mikið magn – annars nægir að grilla bitana og bera þá strax fram
- Kjötið grillað (steikt á pönnu) á báðum hliðum þar til fallegur litur er kominn á það. Gott að leggja kjötið í ofnskúffu jafnóðum og setja það inn í ofn í u.þ.b. 3 – 5 mínútur
- Ath. Kjötbitarnir þurfa mismikla steikingu þar sem þeir geta verið misþykkir – einnig er smekksatriði hversu rautt kjötið á að vera
Meðlæti: Lambakonfektið er sérstaklega gott með fersku og góðu kúskúsi eða ofnsteiktum kartöflum og frískandi piparrótarsósu
Verklýsing 1 – 2
Konfektbitarnir eftir nokkurra daga marineringu
Konfektbitarnir steiktir á pönnu
Konfektbitarnir steiktir á pönnu og lagðir í ofnskúffu
Konfektbitarnir steiktir á grilli
