Kransakakan hennar mömmu
Uppruni
Þessi uppskrift kemur frá mömmu og hefur kransakakan verið bökuð við hátíðleg tækifæri síðustu 25 árin. Hún hefur hannað hana í ýmsum útfærslum ekki síst með það í huga að þurfa ekki að hafa kransakökumót við höndina. Þessa köku má auðveldlega minnka með því að fækka lengjunum. Einnig má leika sér að því að snúa henni á hvolf þó að þá sé vissara að hafa hana í lægri kantinum.
Forvinna
Best að baka kransakökuna einum eða tveimur dögum áður en hún er sett saman og ljúka verkinu daginn fyrir veislu.
Ath. Í uppskriftinni er 2 kg af möndlumassa – það verður töluverður afgangur af kransakökudeigi sem hefur verið notað til að gera litlar kökur sem eru notaðar til að hafa til hliðar eða í kringum kökuna. Auðveldlega má minnka möndlumassan í 1½ kg en þá þarf að minnka sykur og eggjahvítur í samræmi við það.
Hráefni
Kransakaka
- 2 kg möndlumassi
Ath. Það er ekki sama hvaða marsipan er notað. Ég hef verið með það sem fæst í Fjarðarkaupum og þeir pakka sjálfir. Athuga að þetta er kransakökumassi (ekki hjúpmarsipan). Hef notað danska Odense marsipanið, með mismunandi árangri, en þar er sykur- og möndlumagnið mismunandi eftir tegundum. Kökurnar hafa lekið og orðið allt öðruvísi nema þegar ég hef notað marsipanið frá þeim með 63% möndlum – þá hefur það gengið glimrandi vel.
- 750 g strásykur
- 4 – 5 eggjahvítur
Skreyting
- Suðusúkkulaði
- Eggjahvítur
- Flórsykur
- Nokkrir dropar kreistir úr sítrónu
- Skraut – best að nota bita sem gefa stuðning eins og t.d. Macitosh-konfekt
Verklýsing
Kransakaka
- Eggjahvítur og strásykur þeytt saman (ekki eins mikið og í marengs). Möndlumassinn hnoðaður saman við þar til deigið er orðið jafnt. Hnoða þannig að hráefnin blandist vel saman en alls ekki of lengi
- Deigið sett í skál með plasti og geymt í kæli yfir nótt. Ef deigið er ekki kalt, þegar það er rúllað út og bakað, er frekar hætta á að lengjurnar springi við bakstur. Því er gott að setja deigið, sem ekki er verið að rúlla út, í kæli í stað þess að hafa það við stofuhita.
- Ofninn hitaður í 175° – 180°C (yfir- og undirhiti – ekki blásturstilling)
- Deiginu rúllað í lengjur – u.þ.b. 2 cm breiðar. Lengdirnar er mismunandi – sjá lengdir á mynd fyrir neðan. Upplagt er að rúlla það sem verður eftir af deiginu í lengjur og skera þær niður í litla bita. Einnig má búa til stafi til að skreyta kökuna með
- Bakað í 15 mínútur – mikilvægt að fylgjast vel með svo að ekki brenni. Til þess að forðast það er ráð að hafa aðra ofnskúffu í næstu eða þarnæstu rauf fyrir neðan í ofninum (sjá mynd)
- Ath. Gott ráð til þess að kökurnar springi síður er að spreyja eða pensla yfir þær vatni í ofninum. Þó að lengjurnar líti ekki fullkomlega út við fyrstu sýn er margt hægt að fela þegar skreytt er með glassúrnum
Skreyting – glassúr og suðusúkkulaði
- Suðusúkkulaði brætt rólega í skál yfir heitu vatnsbaði
- Kransakökuendunum dýft ofan í – súkkulaðið látið renna af og lengjurnar lagðar á bökunarpappír – látið harðna
- Eggjahvítur og flórsykur – þeytt saman. Fyrst er eggjahvítan aðeins þeytt í smástund og síðan flórsykri bætt saman við
- Nokkrir dropar úr sítrónu settir út í
- Þegar blandan er orðin létt og hvít er ágætt að setja hana í lítinn plastpoka og loka vel fyrir. Klippa smá af einu horninu og sprauta á hverja lengju fyrir sig um leið og kakan er sett saman (sjá mynd)
Samsetning
- Fjórar lengstu lengjurnar mynda botninn á kökunni. Ágætt er að festa við diskinn neðstu lengjurnar með litlu af glassúr – þá verður kakan stöðugri. Tvær lengjur eru svo lagðar samsíða og hinar tvær ofan á þannig að ferningur myndast – sjá mynd.
- Þannig er gert koll af kolli en mikilvægt er að setja sælgætismola á milli hér og þar til stuðnings – sérstaklega neðst. Einnig má nota litlu kransakökubitana til stuðnings neðst
- Kakan þarf að standa á svölum stað – þá eru minni líkur á að bitarnir bogni og sígi niður
Teikining af kransakökunni
Kransakökur í ofninum
Glassúr
Kakan skreytt með glassúr um leið og hún er sett saman
Nota alltaf þennan kransakökumassa.
