Naanbrauð
Uppruni
Uppskriftin varð til úr mörgum uppskriftum – þetta er niðurstaðan sem mér þykir best.
Hráefni
- 3 – 3½ dl hveiti
- 1½ dl heilhveiti
- 1 – 1½ tsk salt
- 25 g pressuger (eða ½ bréf þurrger – 6 g)
- 200 ml volgt vatn – ekki heitara en 37°C
- ½ – 1 tsk sykur
- 40 – 50 g hrein jógúrt – við stofuhita
- ½ – 1 tsk cumin
Meðlæti
- Olía
- Hvítlaukur – pressaður
- Saltflögur
- Perslilja – söxuð (má sleppa)
- Möndluflögur – ristaðar (má sleppa)
Verklýsing
Ath. Mér finnst gott ráð að stilla ofninn á 200°C um leið og pannan er hituð til að baka brauðin. Oft er eitthvað eftir af matarundirbúningnum og þá er gott að skella brauðunum aðeins í ofninn á meðan – bara ekki of lengi þá verða þau hörð.
- Vatn, pressuger og jógúrt blandað saman þar til gerið er uppleyst. Sykri, cumin og hluta af hveitinu blandað saman við – látið standa í u.þ.b. 20 mínútur
- Salti og afgangi af hveitinu bætt við og hnoðað – látið hefast undir klút í 1 klukkustund. (Hægt er að minnka magnið á gerinu og láta brauðið þá hefast lengur)
- Olíu og hvítlauki blandað saman í skál
- Deigið sett á hveitistráða borðplötu og skipt í 6 hluta. Úr hverjum hluta eru búin til 2 naanbrauð. Best er að fletja út hvert brauð fyrir sig og setja á pönnuna. Gott að nota hveiti þegar flatt er út og gæta þess að fletja brauðið frekar þunnt þar sem þau bólngna út þegar þau eru bökuð
- Ögn af olíu sett á pönnu og hún hituð. Gott að hafa góðan hita á pönnunni en ekki endilega hæsta þar sem brauðið brennur þá frekar
- Þegar brauðið hefur verið sett á pönnuna er penslað með hvítlauksolíunni á óbökuðu hliðina – snúið við þegar kominn er fallegur litur á brauðið
- Á meðan brauðið bakast á pönnunni er næsta brauð flatt út og síðan sett á pönnuna
- Gott að strá saltflögum og t.d. möndluflögum og persilju yfir brauðið
- Brauðin eru frekar mjúk og er því gott að setja þau aðeins inn í ofn til að fá á þau smá skorpu (sjá í byrjun verklýsingar). Naanbrauðin eru best ylvolg