Sítrónusörur fyrir þá sem elska sítrónur

Sörur með sítrónubragði

  • Servings: /Magn: u.þ.b. 40 - 70 kökur
  • Difficulty: meðal
  • Print

Uppruni

Þar sem sítrónur eru í miklu uppáhaldi hjá mér ákvað ég fyrir nokkrum árum að útfæra aðeins bláberjasörurnar og búa til sítrónusörur. Þessar eru einar af mínum uppáhaldskökum sem ég baka fyrir hver jól en einnig við sérstök tilefni.

Vinnsla

Mér finnst gott að skipta bakstursferlinu í þrennt og taka klukkutíma í hvert skipti.

  1. Baka botnana – þeir þola vel að geymast í nokkra daga
  2. Útbúa smjörkremið og setja á kökurnar
  3. Hjúpa kremið með súkkulaðinu – oft er þetta tímafrekasti þátturinn og alls ekki gott að vera undir tímapressu með hann

Ath.  Það er smekksatriði hversu stórar kökurnar eiga að vera – ef kökurnar eru mikið fleiri en 50 stk.  dugar kremið kannski ekki alveg en þá má bara búa til meira

Hráefni

Botnar

  • 400 g kransakökumassi – rifinn gróft

Það er ekki sama hvaða marsipan er notað. Ég hef verið með það sem fæst í Fjarðarkaupum og þeir pakka sjálfir. Athuga að þetta er kransakökumassi (ekki hjúpmarsipan). Hef notað danska Odense marsipanið, með mismunandi árangri, en þar er sykur- og möndlumagnið mismunandi eftir tegundum. Kökurnar hafa lekið og orðið allt öðruvísi nema þegar ég hef notað marsipanið frá þeim með 63% möndlum – þá hefur það gengið glimrandi vel.

  • 2 eggjahvítur
  • Tæplega 2½ dl sykur

Sítrónusmjörkrem

  • 200 g ósaltað smjör
  • 1½ dl flórsykur
  • 3 tsk vanillusykur
  • 3 eggjarauður
  • 1 – 1½ lífrænar sítrónur – safi og börkur

Hjúpur

  • U.þ.b. 350 g dökkt suðusúkkulaði

Verklýsing

Botnar

  1. Ofninn hitaður í 180°C (blástursstilling)
  2. Eggjahvítur og sykur þeytt létt saman. Kransakökumassa hrært saman við – ekki of lengi. Blandan sett í kæli í 20 mínútur
  3. Kúlur mótaðar með skeið og settar á ofnplötu með smjörpappír (ágætt að strjúka smjörpappírinn með ísköldu smjöri úr ísskápnum). Einnig má nota sprautu til að útbúa kökurnar. Stærð hverrar köku er smekksatriði – mínar hafa verið að minnka með árunum. Gott að þrýsta aðeins með skeið á kökurnar þannig að þær fletjist svolítið út – þá eru þær stöðugri þegar þær eru hjúpaðar
  4. Bakað í u.þ.b. 8 – 11 mínútur. Mikilvægt að fylgjast með kökunum – ofnar geta verið misheitir. Kökurnar látnar kólna – það má alveg geyma þær í nokkra daga

 

Sítrónusmjörkrem

  1. Þegar smjörkremið er lagað er mjög mikilvægt að öll hráefni séu við stofuhita – þau þurfa að standa úti í einhvern tíma. Ef hitastigið er mismunandi er hætta á að smjörkremið ysti
  2. Smjör og flórsykur þeytt/hrært vel saman. Eggjarauðum bætt við – einni í einu – þeytt á milli. Vanillusykri, sítrónusafa og sítrónuberki (rifnn fínt) þeytt saman við.  Ath.  Gott að blanda berkinum saman við safan og hella svo litlu í einu – þeyta aðeins á milli – þá ystar kremið síður
  3. Ef illa gengur að blanda öllu saman (eins og það ysti) er hægt að setja kremið í örfáar sekúntur í örbylgjuofn og reyna svo að þeyta aftur
  4. Smjörkremið sett á aðra hlið botnanna (sléttu hliðina). Ágætt að móta lítinn sítrónusmjörstopp – sett í kæli (sjá mynd fyrir neðan)

Hjúpur

  1. Helmingur af suðusúkkulaðinu látinn bráðna yfir vatnsbaði á lágum hita. Þegar því er lokið er skálin tekin af hitanum og afgangi af súkkulaðinu bætt við (í bitum) – blandað saman þar til súkkulaðið er allt bráðnað. Þá ætti hitastigið á súkkulaðibráðinni að vera rétt (súkkulaði temprað)
  2. Kökurnar teknar úr kæli – haldið með fingrunum um kökuna og henni dýft ofan í súkkulaðið. Kakan lögð á ofnskúffu (súkkulaðihliðin snýr upp) með bökunarpappír og súkkulaðið látið harðna

Geymsla

Sett í box og inn í kæli – geymist vel

Smjörkremið sett á

IMG_0231

Súkkulaðið brætt yfir vatnsbaði og einni köku í einu dýpt ofan í – gott að láta drjúpa vel af áður en kakan er lögð á disk/ofnskúffuIMG_8850IMG_0230IMG_8847

 

Hef notað þennan kransakökumassa

img_1600

Leave a Comment

Netfang þitt verður ekki birt.

*