Einfaldur og góður chia grautur
Uppruni
Ég fékk frábæran chia graut í Boston og hef reynt að búa til svipaða útgáfu síðan. Eftir hjálp vinkonu minnar, er þessi útgáfa niðurstaðan – hún kemst næst þessum góða graut sem við fengum í Boston. Gott að laga einn svona skammt, setja mátulegt magn í lokaðar krukkur og eiga inni í kæli. Gott að borða eitt og sér en góð byrjun á deginum er að hella graut í skál – bæta við ferskum ávöxtum, hnetum, fræjum eða nota það sem er í uppáhaldi hjá hverjum og einum.
Heimatilbúin möndlumjólk: Stundum bý ég sjálf til möndlumjólkina en þá legg ég möndlurnar í bleyti í nokkra klukkutíma (ekki nauðsynlegt) og helli vatninu síðan frá (sumir vilja afhýða möndlurnar en ég geri það venjulega ekki). Hlutföllin eru 1 dl af möndlum á móti 4 dl af vatni. Möndlurnar settar í blandara maukaðar smátt saman.. vatni bætt við smátt og smátt (þeir sem vilja fá smá sætu geta sett döðlu með möndlunum og/eða aðeins af vanillukornum). Þá kemur annar möguleiki… sigta möndlumjólkina og hafa hana tæra eða hafa hana með möndlukorninu. Ég hef kosið hafa hana ósigtaða í chia grautnum.
Forvinna
Ágætt að búa grautinn til kvöldið áður og geyma hann í kæli.
Hráefni
- 1 dl chia fræ
- 7 – 8 dl möndlumjólk
- 1 tsk vanilluduft (fæst lífrænt í glerkrukkum)
- 1 msk hunang
- 1½ – 2 dl grísk jógúrt
Verklýsing
- Chia fræjum, vanilludufti, hunangi og 2 dl af möndlumjólk blandað saman – hrært reglulega í 10 mínútur svo að ekki myndist klumpar. Bæta 3 dl af möndlumjólkinni við – hrært áfram
- Eftir 15 mínútur er afgangur af möndlumjólkinni settur út í ásamt grísku jógúrtinni. Hrært vel saman
- Grauturinn settur í krukku/krukkur með loki og beint í kæli
Meðlæti
Alls kyns fersk ber, ávextir, hnetur, döðlur, fræ eða ávexti eiga vel við grautinn. Ef til eru bláber í frystinum er upplagt að nota þau.
Geymsla
Grauturinn geymist vel í kæli í nokkra daga.