Rabarbari með kurli og rjóma
Uppruni
Hér kemur eftirréttur sem upplagt er að bjóða upp á þegar rabarbarinn er upp á sitt besta. Ef til eru stilkar frá sumrinu í frystinum er gott að ylja sér á þessum eftirrétti í skammdeginu. Sérstaklega fallegur eftirréttur sem borinn er fram með þeyttum rjóma, vanillusósu eða vanilluís.
Forvinna
Hægt er að búa sér í haginn með því að laga kardimommukurlið fyrr um daginn.
Hráefni
Kardimommukurl
- 50 g smjör
- 2 dl hafragrjón
- ½ dl sykur
- 1 msk hunang
- ½ tsk salt
- 1 tsk steytt kardimomma
Rabarbar
- 500 g rabarbari
- ¼ dl hrásykur
- ½ tsk vanilluduft
- 3 msk smjör – u.þ.b. 45 g
- 1 msk sítrónusafi
Meðlæti
- Rjómi /vanilluís/vanillusósa
Verklýsing
- Ofninn stilltur á 175°C (yfir- og undirhiti)
- Kurl: Smjörið blandað saman við þurrefnið (ef smjörið er hart má setja allt í ofnskúffu með bökunarpappír eða eldfast mót og hræra betur saman þegar smjörið hefur bráðnað) – bakað ofarlega í ofinum í 12 mínútur – hræra í öðru hvoru. Passa að hræra í kurlinu þegar það kemur úr ofninum svo það loði ekki allt saman. Látið kólna – þegar sykurinn og hunangið bráðnar loðir kurlið vel saman. Þess vegna er betra að hræra vel í því
- Rabarbari hreinsaður og skorinn í 8 – 10 cm langar lengjur. Þær settar í ofnskúffu (gott að hafa bökunarpappír undir) og sykri stráð yfir ásamt vanilludufti. Sítrónusafa hellt yfir og smjörklípur settar hér og þar. Bakað í miðjum ofninum í 20- 30 mínútur þar til rabarbarinn mýkist. Gott að ausa vökvanum, sem myndast, öðru hvoru yfir
- Samsetning: 3 – 4 rabarbaralengjur settar á eftirréttadisk og kurli dreift yfir ásamt þeyttum rjóma/vanillusósu eða vanilluís
