Andabringa af bestu gerð
Uppruni
Þar sem ég hef ekki kunnað að elda andabringu fékk ég Vigfús til að aðstoða mig. Það kom mér á óvart hvað það er raunverulega einfalt. Maður þarf bara að vera skipulagður og taka bringurnar tímanlega úr frystinum til að láta þær þiðna í rólegheitum. Strá svo salti yfir og láta þær liggja í salti yfir nótt. Skemmtileg og þægileg matreiðsla. Með öndinni var boðið upp á appelsínusósu sem er líka a la Vigfús.
Hráefni
- 1 andabringa – ef hún er frosin er best að taka hana úr frysti daginn áður. Frönsku andabringurnar hafa verið góðar
- ½ – 1 msk saltflögur
- Nýmalaður pipar
Verklýsing
- Andabringan tekin úr kæli þannig að hún nái stofuhita. Tíglar skornir í fituna – sjá mynd
- Saltflögum stráð á fituna og þeim nuddað vel inn í. Kjötinu snúið við og ögn af saltflögum stráð yfir kjötið. Bringan lögð í fat og plastfilma sett yfir. Látið standa í kæli yfir nótt eða í a.m.k. 6 klukkustundir
- Ofninn stilltur á 150°C (yfir- og undirhiti)
- Andabringan sett á kalda pönnuna – fituröndin látin snúa niður. Hitinn hækkaður upp í rúmlega meðalhita. Góður litur látinn koma á fituhliðina. Því næst er kjötinu snúið við eldsnöggt og því rétt lokað. Kjötið sett aftur á fituröndina. Hitamæli stungið inn í mitt kjötið. Pipar mulinn yfir og pannan sett inn í ofninn
- Þegar kjötið er komið í 49°- 50°C er það tekið út. Það má gera ráð fyrir að kjarnhiti kjötsins hækki um 3° – 4° eftir að bringan kemur úr ofninum. Kjarnhiti kjötsins ætti að enda í 53° – 54°C. Kjötið skorið í sneiðar
Meðlæti: Appelsínusósa, kartöflur eins og t.d. stökkar kartöflur og gulrætur og gómsætir gulrótarstrimlar
