Fljótleg rúlluterta með þristum
Uppruni
Áttu von á gestum og hefur knappan tíma? Þá er þrusu þristarúlluterta einfaldlega málið. Rúllutertur eru almennt sérstaklega þægilegar þar sem bökunartíminn er einungis 5 mínútur. Í þessari útgáfu er fyllingin þeyttur rjómi og rifnir þristar… einfaldara getur það ekki verið.
Hráefni
Svampbotn
- 3 egg
- 1½ dl sykur
- 1 dl kartöflumjöl
- 2 msk kakó
- 1 tsk lyftiduft
Fylling
- 150 – 160 g þristar (10 stk litlir eða 3 stórir)
- 3 dl rjómi
- Skraut: Flórsykur og þristakurl
Verklýsing
Svambotn
- Ofninn hitaður í 250°C (yfir- og undirhiti)
- Egg þeytt með sykri (í hrærivél) þar til blandan er orðin létt og loftkennd
- Kartöflumjöli, kakói og lyftidufti blandað saman, sigtað í eggjahræruna og hrært varlega saman við með sleikju
- Bökunarpappír smurður með olíu eða köldu smjöri og lagður í ofnskúffu. Deigið breitt jafnt út á bökunarpappírinn og bakað í 5 mínútur
- Kökunni hvolft á smjörpappír. Mjög gott að strá aðeins sykri yfir kökuna eða á pappírinn, sem hvolfa á yfir, bökunarpappírinn fjarlægður og ofnskúffan sett yfir á meðan kakan kólnar
Samsetning
- Þristar rifnir niður með rifjárni eða saxaðir
- Rjómi þeyttur
- Rjómanum dreift yfir kökuna – gott að nota sleikju
- Þristaspæninu dreift yfir rjómann
- Kakan rúlluð upp – það er fallegt að skreyta með flórsykri og rifnum þristi. Nokkur fersk ber punta mikið
