Túnfiskur og tóm hollusta
Uppruni
Hér kemur ein frábær uppskrift úr einu góðu matarboði sem ég fór í fyrir nokkru. Í uppskriftinni er túnfiskurinn marineraður. Þá er bæði í boði að kaupa hann þannig eða frosinn og setja hann síðan í marineringu. Það munar töluvert mikið á verði hvor leiðin er valin … bara mikilvægt að gefa sér 1 – 2 daga fyrir marineringuna. Einnig er gott að láta hann þiðna í kæli í rólegheitum yfir nótt. Það er mjög mikill kostur við þenna rétt hvað hann er þægilegur í undirbúningi … sennilega er mesta áskorunin falin í því að kaupa mátulega þroskuð mangó og avókadó. Góður og léttur matur í maga sem hægt er að mæla með.
Hráefni
- 150 – 200 g á mann af marineruðum túnfiski (olía, niðurskorinn/rifinn engifer, saxað ferskt kóriander og ferskur rauður chilipipar skorinn í sneiðar (flest fræin fá að fylgja með)
- Soðin hrísgrjón (gera má ráð fyrir 1 – 2 dl af soðnum hrísgrjónum á mann
- Chilimæjó
- Edamame baunir – hægt að kaupa þær frosnar en tilbúnar í Fiska
- Mátulega þroskað mangó – afhýtt og skorið í fallegar sneiðar
- Mátulega þroskað avókadó – afhýtt og skorið í fallegar sneiðar
- Gulætur – skornar í stilka, settar í sjóðandi vatn og soðnar í 3 mínútur
- Gúrka – skorin í stilka
- Makadamíahnetur
- Lime – skorið í báta
Sósa
- ½ bolli soja sósa
- ¼ bolli appelsínusafi (u.þ.b. safi úr einni appelsínu)
- 2 msk sítrónusafi
- 1 msk hrísgrjónaedik
Verklýsing
- Mikilvægt er að taka túnfiskinn úr kæli í tíma svo hann nái stofuhita
- Edamame baunir teknar úr frysti og látnar þiðna
- Hrísgrjón og gulrætur soðið
- Sósa Öllum hráefnum blandað saman
- Panna hituð vel og túnfiskurinn steiktur á háum hita í eina mínútu á hvorri hlið. Það sama gildir ef túnfiskurinn er grillaður. Þá er mikilvægt að hitinn sé hár. Eftir steikingu á báðum hliðum er túnfiskurinn settur á bretti og látinn jafna sig aðeins áður en hann er skorinn í fallegar sneiðar
- Framsetning: Hún er svolítið persónubundin. Mér finnst gaman að skammta hráefni á disk fyrir hvern og einn og skera svo túnfiskinn í þunnar sneiðar. Einnig má setja á eitt stórt fat eða mörg föt þannig að hver og einn fær sér að vild
Hráefni í sósuna
Túnfiskur og hluti af meðlætinu
Túnfiskurinn á grillið
