Græn og gómsæt gazpacho súpa

Gazpacho með hráskinku og burrata

Servings: 4 - 6
Time: 30 mínútur en þarf að jafna sig í 2 - 3 klukkustundir
Difficulty: auðvelt
Print

Uppruni

Þessa frábæru súpu fékk ég í matarboði um daginn og mér þótti hún algjört æði. Kaldar súpur hafa almennt ekki heillað mig en þessi er öðruvísi. Ekki spillir fyrir að súpan er sneisafull af hollustu.

Forvinnsla

Súpuna má gjarnan búa til daginn áður og geyma í kæli – gott að taka hana út töluvert áður þannig að hún nái stofuhita.

Hráefni

1 meðalstór tómatur – skorinn í bita
1 gúrka – fræhreinsuð og skorin í bita
3 vorlaukar – skornir í sneiðar
1 ferskur jalapenó (eða sambærilegt) – fræhreinsaður og skorinn í bita (fyrir þá sem eru fyrir sterkt má alveg láta nokkur fræ fylgja með)
1 grænn chilipipar – fræhreinsaður og skorinn í bita
2 stönglar af selleríi – skornir í bita
2 hvítlauksrif – skorin í tvennt
Lúka af ferskum koríander
2 msk hrísgrjónaedik
3 msk góð extra virgin olía
500 ml grænmetiskraftur (2 tsk kraftur og 500 ml vatn)
40 – 50 g klettasalat (ruccola) – geyma nokkur blöð fyrir skraut
2 tsk saltflögur
6 sneiðar af hráskinku (prosciutto)
2 stk burrata ostur (fæst oft mjög góður í Costco)

Verklýsing

Allt hráefni nema hráskinkan og burrata osturinn sett í matvinnsluvél og maukað vel saman. Blöndunni hellt í gegnum sigti og látið jafna sig í 2 – 3 klukkustundir eða yfir nótt. Súpan á að vera frekar þunn
Ofninn hitaður í 180°C
Hráskinkan sett á bökunarpappír í ofnskúffu og bökuð í 8 – 10 mínútur eða þar til hún verður stökk
Þegar búið er að hella súpu í 4 – 6 súpudiska er ostunum skipt jafnt niður og settir á miðjan diskinn. Bitum af stökkri hráskinkunni dreift yfir hér og þar
Skraut: Fallegt að hella nokkrum litlum dropum af góðri olíu yfir súpuna. Mylja svo aðeins af pipar yfir…. jafnvel strá 2 – 3 saltflögum yfir. Í lokin er nokkrum blöðum af klettasalati eða fersku kóríander dreift yfir