Hvernig á að sjóða hrísgrjón
Uppruni
Nokkur grundvallaratriði í matseld vefjast stundum fyrir heimilisfólkinu og hef ég vinsamlegast verið beðin um að setja inn þessar upplýsingar. Hér kemur það fyrsta…. hvernig sjóða skal hrísgrjón. Ég átta mig á að til eru nokkrar útgáfur – sumir vilja að hrísgrjón séu smá klístrug og aðrir vilja að þau séu laus í sér. Mér finnst gott þegar þau loða aðeins saman en þetta snýst líka um hvaða tegund er notuð. Hér kemur okkar útgáfa af því hvernig sjóða skal hrísgrjón…
Hráefni
- 1 dl hrísgrjón – við notum Jasmine hrísgrjón
- 2 dl vatn
- ¼ tsk salt
Verklýsing
- Vatn sett í pott og hitað að suðu
- Hrísgrjónin sett út í – blandað saman ásamt salti, hitinn lækkaður og hrísgrjónin látin malla í 22 mínútur. Hitinn ætti að vera á milli meðalhita og lægsta hita. Lokið er haft á nema rétt fyrst á meðan hitinn er að ná suðu og lækkaður síðan – þá er smá rifa höfð svo bubblist síður upp úr pottinum
Nokkur atriði til viðbót:
- Sumum finnst betra að skola hrísgrjónin fyrst þannig að sterkjan fari úr þeim. Það er hægt að gera með því að láta þau liggja í vatni (alveg upp í klukkustund) áður en þau eru soðin og sigta þau svo frá. Stundum set ég þau í vatn og læt suðuna koma upp – læt þau sjóða aðeins í nokkrar mínútur og skola síðan. Þá þurfa þau aðeins minni suðu
- Stundum er sniðugt að breyta til og setja t.d. turmerik í vatnið þannig að hrísgrjónin verði gul – það þótti börnunum mínum stundum sport þegar þau voru minni
- Upplagt að nota afganga í hrísgrjónagraut eða steikja þá á pönnu með kryddi sem hverjum og einum finnst gott
- Soðin hrísgrjón geymast vel í kæli – það fer ekki á milli mála ef þau eru orðin of gömul – nota bara nefið