Góðir og barnvænir pizzusnúðar í nestisboxið
Uppruni
Hvað er skemmtilegra en að hafa lítinn hjálparkokk með sér í eldhúsinu sem vill gjarnan taka þátt í matargerðinni. Þegar þannig stendur á er upplagt að skella í þessa einföldu uppskrift. Ekki spillir fyrir að það er alltaf gott að eiga pizzusnúða í frysti… taka þá út að morgni og stinga í nestisboxið. Með hjálparkokk sér við hlið verður baksturinn bæði skemmtileg og nærandi samverustund sem skilur eftir góðar minningar og líka…slatta af hveiti úti um allt! Ég er ekki í vafa um að það sé dýrmætt og gott fyrir börn að virkja þau í eldhúsinu … þó matseldin taki kannski aðeins lengri tíma og aðeins meiri frágang – þá búa þau að því í framtíðinni.
Hráefni
Deig
- 5 dl mjólk
- 1 bréf þurrger (50 g pressuger)
- ½ dl ólífuolía
- 2 tsk salt
- 1 egg
- 12 – 14 dl hveiti
Fylling – hugmyndir
- Krukka af niðursoðnum tómötum – maukaðir/saxaðir – líka gott með basil/hvítlauk
- Skinka/pepperóni – má sleppa
- Rifinn ostur – u.þ.b. 200 g
Ofan á
- 1 egg (hrært)
- Rifinn ostur eða parmesanostur
Verklýsing
Deig
- Mjólk sett í pott og hituð þannig að hún verði ylvolg – alls ekki hærra en 37°C – frekar aðeins lægra. Olíu og eggi blandað saman við mjólkina
- Þurrger og salt sett í skál. Hluti af mjólkurblöndunni settur í skálina og blandað saman með sleikju (sjá myndband)
- Nokkrum dl af hveiti blandað saman við með sleikju og hrært saman. Afgangi af hveiti bætt við og hnoðað þar til deigið verður þannig að það klístrist ekki við fingurna – passa samt að hafa það ekki of þurrt
- Látið hefast í u.þ.b. 45 mínútur með klút yfir skálinni (gott að skálin sé þar sem ekki er mikill trekkur eða leyfa sólinni að skína á hana) – láta það lyftast tvöfalt
- Deigið sett á hveitistráð borð og flatt út ca. 30 x 40 cm
- Pizzusósu/söxuðum tómötum dreift yfir ásamt pepperóni, skinku eða það sem hver og einn vill ásamt osti
- Rúllað saman og skorið í bita. Best að skipta rúllunni fyrst í tvennt, skipta síðan hvorum helmingi í þrjá hluta og síðan hverjum þriðjungi í þrennt. Það eiga að koma 18 snúðar í það heila. Gott að gera far með hnífnum, þegar verið er að skipta niður, og skera svo alveg niður þegar búið er að áætla stærð snúðanna (sjá myndband)
- Sett á bökunarpappír og látið hefast undir dúk (viskustykki) í 30 mínútur. Yfirleitt komast 9 snúðar á eina bökunarplötu
- Ofninn hitaður í 250°C
- Penslað með hrærðu eggi og rifnum osti dreift yfir. Bakað í ca. 8 -12 mínútur
Geymsla
Það er mjög vinsælt að eiga pizzusnúða í frystinum. Upplagt að ná sér í einn að morgni og taka með sér í nesti. Þá þiðnar hann hægt og rólega og er orðinn dúnmjúkur í hádeginu.
