Rúlluterta með kókos og rifsberjasmjöri (rifsberjacurd)
Uppruni
Hér kemur enn ein rúllutertuuppskriftin en þær eru með því fljótlegasta sem hægt er að baka. Það tekur u.þ.b. 10 mínútur að búa til deigið og hita ofninn. Baksturinn tekur svo 5 mínútur. Þá er bara eftir að setja fyllinguna ofna á. Rifsberjasmjörið má búa til löngu áður og eiga í kæli. Það tekur örstutta stund að setja fyllinguna á og rúlla kökunni upp
Forvinna
Tilvalið að búa rifsberjasmjörið til daginn áður eða nokkrum dögum áður – það geymist vel í kæli. Botninn má alveg baka daginn áður en þá er best að kæla hann alveg (láta ofnskúffuna liggja yfir í góðan tíma) og setja hann síðan í stóran plastpoka (láta bökunarpappírinn fylgja með). Best er að setja fyllinguna á og rúlla kökunni upp sama dag og boðið er upp á hana.
Hráefni
Botn
- 3 egg
- 1½ dl sykur
- 6 msk kartöflumjöl
- 1 tsk lyftiduft
- 1 tsk vanillusykur
Fylling
- 2 dl rjómi
- 1½ dl grísk jógúrt
- 1½ – 2 dl rifsberjasmjör
- 1 tsk vanillusykur
- ½ – 1 dl kókosmjöl
Verklýsing
Botn
- Ofninn hitaður í 250°C (yfir- og undirhiti)
- Egg og sykur hvítþeytt
- Kartöflumjöli, lyftidufti og vanillusykri blandað saman og sigtað út í hvítþeytt eggin – betra að sigta hluta í einu og blanda varlega saman
- Bökunarpappír settur í ofnskúffu – gott að smyrja pappírinn aðeins með hörðu smjöri
- Deiginu dreift yfir pappírinn og bakað í 5 mínútur – fylgjast með svo að kakan verði ekki of dökk
- Kökunni hvolft á annan bökunarpappír sem búið er að dreifa kókosmjölinu á – hinn tekinn af og ofnskúffa lögð yfir – það er gert til þess að koma í veg fyrir að kakan harðni
Fylling og samsetning
- Rjóminn þeyttur – vanillusykri blandað saman við. Grískri jógúrt blandað saman við í lokin
- Ofnskúffan tekin af kökunni og rifsberjasmjöri smurt yfir
- Rjómablöndunni dreift yfir og kakan rúlluð upp – gott að nota bökunarpappírinn til að hjálpa við það
- Rúllutertuna er hægt að bera fram heila á fallegu bretti/fati og skreyta eins og hverjum og einum dettur í hug
Geymsla: Rúllutertuna er best að geyma í kæli – hún er líka góð daginn eftir.
Botn
Kakan látin kólna undir ofnskúffunni
Rifsberjasmjörið (curdið)
Samsetning
