Djúpsteiktur þorskhnakki með heimagerðu remúlaði og coleslaw
Uppruni
Ég veit að þetta er kannski ekki það allra hollasta en það er svo gaman þegar einhver réttur höfðar til margra aldurshópa. Fiskurinn sem slíkur er ekki óhollur enda brakandi ferskur þegar hann kemur upp úr pottinum Ég er búin að mæla hvað fer mikið af olíu þegar fiskurinn er djúpsteiktur og það er ekki mikið….. en meðlætið er smá ,,djúsi¨ en það gerir svo sem ekki mikið til svona endrum og eins.
Forvinna
Salatið (coleslaw) má búa til fyrr um daginn og einnig er gott að útbúa remúlaðið eitthvað áður – gott að láta það taka sig. Ég laga einnig deigið eitthvað áður og læt það aðeins standa. Best að djúpsteikja fiskinn rétt áður en hann er borinn fram.
Hráefni
Fiskur og kartöflur
- Rúmlega 1 kg þorskhnakki (u.þ.b. 12 bitar)
- Olía sem þolir vel hita – ég hef notað Sólblómaolíu (einnig má nota repjuolíu en það er meira bragð af henni)
- 1,5 kg kartöflur – soðnar í 15 mínútur og síðan skornar í strimla eða litla báta
Orlydeig
- 300 ml bjór
- 1 msk sykur
- 1 tsk salt
- 1 msk olía
- 1 eggjarauða
- 285 g hveiti
- 1 msk maizenamjöl
- Aðeins af pipar
- 1 eggjahvíta
Remúlaði
- 1 dl sýrður rjómi
- ½ dl majónes
- ½ tsk dijon sinnep
- 1 tsk kapers – saxað
- ½ skarlottulaukur – saxaður
- 1 msk fersk steinselja – söxuð
- ½ tsk sykur
- Ögn af pipar
- 2 msk relish
- Nokkrir dropar af sítrónusafa
- Salt
- Karrý á hnífsoddi
Coleslaw
- 6 dl hvítkál – skorið í fínar ræmur
- 2 dl gulrætur – rifnar
- 1 dl majónes
- 1 dl sýrður rjómi
- ¼ dl hvítvínsedik
- ¼ dl sykur
- Tæplega 1 tsk sellerífræ (má sleppa)
Verklýsing
Orlydeig
- Bjór, hveiti, sykur, olía, maizenamjöl, pipar og eggjarauða pískað saman – látið standa í 1 klukkustund
- Eggjahvítan þeytt og blandað varlega saman við rétt áður en deigið er notað
Fiskur og kartöflur djúpsteikt
- Fiskur skorinn í bita
- Olía hituð í potti – gott að hafa yfirborðið sem mest svo hægt sé að djúpsteikja meira í einu. Djúpsteiking: Best er að olían nái 180°C (nota hitamæli). Ef hitinn verður mikið hærri er hætta á að deigið/kartöflurnar brenni
- Ágætt að djúpsteikja kartöflurnar fyrst – ofninn hitaður í u.þ.b. 150°C. Kartöflur djúpsteiktar þar til kominn er fallegur litur á þær. Hægt er líka að tvísteikja þær – fyrst 8 – 10 mínútur og svo aftur 4 – 5 mínútur (það má alveg líða svolítill tími á millli steikinga). Kartöflurnar settar á fat og þeim haldið heitum í ofninum – forðast að hafa of lengi í ofninum.
- Fiskbitum dýpt ofan í deigið og djúpsteikt í u.þ.b. 5 mínútur eða þar til kominn er fallegur litur á þá – sjá myndband
- Gott að setja fiskinn á eldhúspappír og láta olíuna renna aðeins af
Remúlaði
- Öllu hráefni blandað saman í skál og hrært saman
Coleslaw
- Öllu hráefni blandað saman. Hef ekki alltaf átt sellerífræ en það hefur ekki komið að sök
Meðlæti
Chilimæjó er einnig gott með.
