Mexikósk kjúklingasúpa með nachos
Uppruni
Uppskriftina fékk ég hjá Elínu, vinkonu tengdamóður minnar, fyrir mörgum árum. Ég bjó súpuna til þá en hún féll ekki í kramið hjá börnunum – þótti of sterk. Núna þykir þeim hún vera mjög góð. Strákurinn minn botnar ekkert í því af hverju honum þykir þessi súpa svona góð af því að honum finnst tómatar bara alls ekki góðir.
Forvinna
Súpuna má alveg laga daginn áður en hún er borin fram.
Hráefni
Súpa
- Olía til steikingar + smá klípa af smjöri
- 3 laukar – saxaðir
- 2 – 3 hvítlauksrif – söxuð/pressuð
- 1 rauður chilipipar – saxaður (því meira af fræjum þeim mun sterkari verður súpan. Ég set ekki mikið af fræjum)
- 1 flaska af tómatpassata 425 g t.d. frá Himneskri hollustu
- ½ – 1 lítri vatn
- 5 dl kjúklingasoð (5 dl vatn + 2 tsk kjúklingakraftur/1 kubbur – athuga leiðbeiningar á umbúðum)
- 2 tsk Worchestersósa
- ½ – 1 tsk cayenne pipar (þeir sem vilja extra sterkt geta sett líka 1 tsk chilikrydd)
- 2 dósir niðursoðnir tómatar eða 2 flöskur af maukuðum tómötum frá Sollu
- Má einnig setja 2 dl af rjóma
Kjúklingur
- 3 – 4 kjúklingabringur
- Papríkukrydd
- Krydd eins og t.d. hvítlaukssalt eða sítrónupipar
Meðlæti – hugmyndir
- Guacamole eins og Guacamole eða Lúxus guacamole
- Sýrður rjómi eða blanda af sýrðum rjóma og rjómaosti
- Nachos flögur
- Rifinn ostur t.d. mozzarellaostur
Verklýsing
Súpa
- Olía og smjör sett í pott – laukur látinn malla í u.þ.b. 5 mínútur á meðalhita. Chilipipar og hvítlauksrifi bætt við – látið malla á vægum hita í nokkrar mínútur
- Það sem eftir er af hráefni, að frátöldum rjóma, sett í pottinn og látið sjóða í 45 – 60 mínútur. Fyrir þá sem vilja mauka súpuna er upplagt að nota töfrasprota. Rjóma bætt við
Kjúklingur
- Eldað í Hönnupotti: Ofninn stilltur á 150°C (blástur). Bringur kryddaðar með papriku og settar í pottinn. Látið eldast í ofninum í 1 klukkustund (ágætt að taka út eftir 55 mínútur og setja kjöthitamæli í eina bringuna. Ef hann sýnir 72°C er kjúklingurinn tilbúinn)
- Kjúklingur tekinn úr pottinum og safanum, sem eftir er, hellt í súpuna. Kjúklingurinn skorinn niður í bita/strimla og kryddaður (gott að í kryddinu sé eitthvað salt). Kjúklingabitar settir í súpuna
- Steikt á pönnu: Kjúklingabringur skornar í bita og kryddaðar með papríkukryddi
- Kjúklingabitar steiktir á pönnu í u.þ.b. 5 mínútur eða þar til þeir eru steiktir í gegn. Ágætt að krydda aðeins með kryddi sem inniheldur smá salt. Bitarnir settir út í súpuna og súpan látin malla í 5 – 10 mínútur
Meðlæti og samsetning
- Súpan sett í skálar – hver og einn velur meðlætið eftir sínum smekk
- Allt frjálst og engin regla en börnin mín setja ostinn fyrst svo hann bráðni og enda á flögunum
Geymsla
Súpuna má frysta
Hráefni
Súpan má vera maukuð (valfrjálst)
Súpa án rjóma og með rjóma (hægra megin)
Kjúklingur eldaður í Hönnupotti
Soðinu úr pottinum hellt í súpuna, kjúklingurinn skorinn niður, aðeins kryddaður og settur út í súpuna
Kjúklingurinn skorinn niður og steiktur á pönnu
