Kramdar og kraumandi kartöflur

Kramdar kartöflur með birkifræjum

Servings: fyrir 3
Time: 30 mínútur
Difficulty: auðvelt
Prenta

Uppruni

Ég fór einu sinni á veitingastað í New York og fékk þar svipaðar kartöflur með hamborgaranum. Skemmtileg tilbreyting og passar vel við ýmsa kjötrétti eins og t.d. hægeldað lambalæri og heilsteiktar lambakórónur.

Forvinna

Upplagt að forsjóða kartöflurnar. Oft hef ég allt tilbúið og á þá bara eftir að stinga þeim í ofninn til að hita þær.

Hráefni

500 g kartöflur
1½ msk dökk birkifræ
½ msk vatn
½ dl olía
Saltflögur

Verklýsing

Kartöflur forsoðnar í u.þ.b. 10 mínútur – háð stærð
Birkifræin látin standa á meðan í bleyti í vatni
Ofninn hitaður í 220°C
Kartöflur flysjaðar, ef þess þarf, og þær skornar í tvennt (ef þær eru stórar). Þrýst á kartöflurnar (ég hef notað hnífsblað) þannig að þær verða aðeins kramdar. Kartöflurnar settar í skál
Birkifræjum, vatni og olíu blandað saman – hellt yfir kartöflurnar og blandað saman
Sett í ofnskúffu og látið krauma í ofninum í u.þ.b. 15 – 20 mínútur. Ágætt að hræra 1 – 2 sinnum til að fá jafnan lit

Á vel við

Grillkjöt og hamborgara.