Fyllt pasta í tómatasósu - fljótleg matargerð
Uppruni
Uppskriftin varð til þegar ég þurfti að útbúa pastarétt í snatri og ég horfði á ofþroskaða tómata í gluggakistunni. Mjög fljótlegur og ódýr réttur ef Heimagerð tómatsósa (sjá: Uppskriftir – Ýmislegt) er til í ísskápnum. Eflaust hægt að nota eitthvað annað – t.d. tómatamauk frá Sollu.
Forvinna
Sósuna er hægt að laga töluvert áður og hita rétt áður en hún er borin fram.
Hráefni
- 2 hvítlauksrif – pressuð
- Olía – u.þ.b. 1 msk
- 1 – 2 dl heimagerð tómatsósa
- 2 stórir vel þroskaðir tómatar
- 1 – 2 blöð af salvíu eða basil
- 250 g ferskt tortellini pasta – fyllt með osti og tómötum
Verklýsing
- Vatn hitað að suðu í potti – tómatar settir ofan í (vatnið látið fljóta yfir) og þeir soðnir í u.þ.b. 3 mínútur
- Tómatarnir veiddir upp úr og hýðið tekið af – þeir skornir í bita
- Olía sett í pott ásamt hvítlauk – látið krauma á lágum hita
- Heimagerða tómatsósan sett í pottinn ásamt tómötunum
- Salvía skorin í litlar sneiðar og henni bætt í pottinn – ef notaður er basil er hann settur í um leið og sósan er borin fram
- Tortellini soðið og sett á fat
- Tómatasósunni hellt yfir og salviu eða basil stráð yfir
Meðlæti
Gott að rífa parmesanost yfir og þessi réttur bragðast vel með nýbökuðu brauði.