Heimagert múslí
Uppruni
Þessi uppskrift kemur frá mömmu og fylgdi hún henni frá Svíþjóð á sínum tíma. Fljótleg og auðveld leið til að fá sér hollan og góðan morgunmat auk þess er miklu skemmtilegra að búa sjálfur til sitt eigið múslí.
Hráefni
- 10 dl haframjöl
- 4 dl kókosmjöl
- 2½ dl hveitiklíð
- 1,3 dl hörfræ
- 2½ dl hnetukjarnar (t.d. valhnetur, möndlur og/eða heslihnetur)
- 1,3 dl matarolía
- 1,3 dl hunang
- 1 – 5 msk hnetusmjör
- 1 – 2 tsk vanilludropar
- Rúsínur, gráfíkjur, döðlur, graskersfræ – eftir smekk (má sleppa)
Verklýsing
- Ofninn hitaður í 150°- 175°C (yfir- og undirhiti)
- Öllum þurrefnum blandað saman (ekki rúsínum, gráfíkjum og döðlum) í skál. Matarolíu, hunangi, hnetusmjöri og vanilludropum hrært saman í aðra skál – gott að allt blandist vel saman.
- Öllu blandað saman – sett í eldfast mót (ofnskúffu) og síðan í ofninn í 25 – 30 mínútur. Hrært í af og til – á ca. 5 – 7 mínútna fresti
- Rétt í lokin er rúsínum, gráfikjum og/eða döðlum bætt við – blandað saman. Sett inn í ofn í 5 mínútur. Gott að hræra vel þegar múslíið kemur heitt út úr ofninum
Meðlæti
Á vel við Ab-mjólkina á morgnana auk ávaxta. Mér finnst gott að blanda saman ólíkum múslítegundum saman við heimagert múslí eins og Hollustunasl-múslí, og Múslí með kakói
Geymist vel í lokuðu íláti
Hugmynd að eftirétti eða sætum bita með kaffinu
Bræða suðusúkkulaði og núggat (má sleppa) í skál undir heitu vatnsbaði. Dreifa bræddu súkkulaðinu á bökunarpappír og strá múslí yfir. Gott að bæta við aðeins af kókosmjöli og saltflögum – kæla og brjóta svo í hæfilega stóra bita 🙂
