Einfalt og gott fyrir stóra sem smáa
Uppruni
Áttu 90 mínútur til að elda matinn í ofninum og langar að hafa eitthvað einfalt og gott? Þá er þessi barnvæni réttur tilvalinn. Kosturinn er að hver og einn getur útfært réttinn eins og hann vill. Á mínu heimili vilja flestir hrísgrjón sem meðlæti og sósan þykir algjörlega ómissandi. Mér finnst hins vegar best að borða kjúllann með fullt af fersku salati og toppurinn er, ef ég á hoppandi góða hvítlaukssósu, að hafa hana með. Kjúllann elda ég í Hönnupotti en hægt er að nota sambærilegan pott sem þolir að fara inn í heitan ofn.
Hráefni
- Heill kjúklingur
- Kjúklingakrydd
Sósa
- 2½ dl kjúklingasoð (2½ dl heitt vatn og 1 msk kjúklingakraftur)
- 1 – 1½ msk sósujafnari
- ½ – 1 dl matreiðlsurjómi
- ½ – 1 msk kjúklingakrydd
- Soðið af kjúklingnum
Verklýsing
- Ofninn hitaður í 180°C (blásturstilling). Kjúklingurinn kryddaður vel og settur í pottinn. Lokið sett á og látið eldast í klukkustund
- Eftir klukkutímann er gott að taka út pottinn og setja kjöthitamæli í bringuna (lokið sett aftur á). Þegar hitamælirinn sýnir 75°C ætti kjúllinn að vera orðinn eldaður
- Sósa: Kjúklingakraftur og vatn sett í pott – hitað. Sósujafnara bætt við og suðan látin koma upp. Rjóma bætt við ásamt kjúklingakryddinu. Þegar kjúllinn er tilbúinn er soðinu, sem kemur af honum, hellt saman við – hrært. Ef sósan verður þunn eftir þetta má bæta við aðeins sósujafnara til að þykkja hana
- Kjúklingurinn settur á bretti og skorinn niður
Meðlæti: Hrísgrjón og salat
