Bræddur Búri í smábrauði með hunangi og chiliflögum
Uppruni
Þessi ostabræðingur er hugmynd frá henni Drífu en hún bar hann fram í litlum Hönnupotti. Þetta var alveg glimrandi gott og sniðugt að bjóða upp á sem smárétt þegar von er á gestum. Um daginn var ég með veislu og datt í hug að baka lítið súrdeigsbrauð í litlum Hönnupotti og bera ostabræðinginn fram í því. Það kom vel út og er fallegt á borði. Ef osturinn klárast í brauðinu er minnsta málið að setja aftur ost ofan í brauðið og inn í ofn. Ég hef einnig prófað að baka smábrauð úr súrdeigspizzudeigi sem ég átti afgang af. Einnig má alveg baka litla gerbrauðsbollu og/eða nota lítinn pottaling til að bera fram í .. bara það sem hentar best.
Forvinna
Brauðbolluna má búa til daginn áður – eins má hafa réttinn tilbúinn töluvert áður og þá er bara eftir að skella honum inn í ofninn.
Hráefni
Verklýsing
- Ofninn hitaður í 225°C (yfir- og undirhiti). Einnig má líka stilla á grill
- Ef brauð er notað er hringur skorinn ofan í það og brauðið losað innan úr – sjá myndband
- Búrinn skorinn í bita sem eru settir ofan í brauðkúluna (eða í lítið ílát). Hunangi og chili er dreift yfir þegar helmingurinn af ostinum er kominn ofan í og svo aftur í lokin. Það er persónubundið hversu mikið af chili og hunangi skal nota. Það má alveg fylla holuna vel af osti
- Ef brauðið er bakað í litlum potti má nota hann aftur til að setja brauðið inn í ofninn en einnig má bara setja brauðið á grind í ofninum. Látið vera í ofninum í u.þ.b. 10 mínútur eða þangað til osturinn hefur bráðnað
- Borið fram með kexi eða brauði. Ath. ef osturinn klárast er ekkert mál að fylla brauðið aftur og setja inn í ofn á ný