Einfaldir hnetubitar
Uppruni
Það er fátt skemmtilegra en að búa til eitthvað gott á stuttum tíma. Eins og oft áður rakst ég á þessa uppskrift að orkuríkum hnetubitum í sænsku blöðunum mínum. Ég ákvað að prófa og það er alveg hægt að mæla með þessum heimagerðu “snickers” bitum. Gott að eiga til að bjóða upp á … eða gæða sér á sjálfur.
Hráefni
- 350 g hnetusmjör
- 1 dl síróp
- 1 dl sykur
- 6 dl Rice Krispies
- 1½ – 2 dl salthnetur
- 1 dl trönuber – má sleppa
Ofan á
- 200 g mjólkursúkkulaði
- 1 dl salthnetur – saxaðar aðeins
Verklýsing
- Bökunarpappír settur í form sem er u.þ.b. 20×30 cm
- Hnetusmjör, síróp og sykur sett í pott og látið bráðna saman – má alls ekki sjóða
- Rice Krispies, hnetur og trönuber sett í stóra skál
- Hnetublandan úr pottinum sett saman við – blandað saman með sleikju
- Allt sett í formið og látið fylla vel út í öll horn – gott að þrýsta aðeins niður svo að bitarnir verði síður lausir í sér. Plastfilma sett yfir og látið standa í kæli í a.m.k. 2 klukkustundir
- Ofan á: Súkkulaði brætt rólega í vatnsbaði og smurt yfir. Hnetum stráð yfir
- Látið jafna sig í smá tíma og síðan skorið niður í hæfilega stóra bita – stærðin er að sjálfsögðu smekksatriði
