Frönsk baka sem svíkur engan
Uppruni
Ég fékk þessa góðu böku hjá Dössu en þessi uppskrift kemur úr smiðju tengdamóður hennar þegar hún bjó í Frakklandi fyrir mörgum árum. Mér fannst bakan mjög góð og var svo heppin af fá uppskriftina. Skellti í eina böku heima og féll hún heldur betur vel í kramið. Hún þótti svo góð að unga fólkið á heimilinu tók með sér sneiðar í nesti daginn eftir. Ég hef oftar en einu sinni tekið með mér sneið í flug ásamt fersku salati og hef klárlega verið með besta matinn um borð.
Hráefni
Botn (pate brisee)
- 4 dl hveiti
- 1 tsk salt
- 75 – 80 g smjör (6 msk) – við stofuhita
- 5 msk vatn
Fylling
- 180 g beikon (1 beikonbréf)
- Ostaneiðar
- 4 egg
- 2 bollar rjómi eða matreiðslurjómi (má einnig nota sýrðan rjóma þynntan með mjólk)
- 1 msk hveiti
- Salt
- ¼ tsk múskat
- Cayenne pipar á hnífsoddi
- Hvítur pipar
Verklýsing
Botn
- Hveiti sett í skál. Smjör sett út í og mulið hratt saman með hníf (má ekki bræða smjörið í potti)
- Salti bætt við og síðan vatni
- Allt hrært saman og hnoðað aðeins með fingrunum (í skálinni) – deigið á ekki að hnoða í hrærivél
- Sett í ísskáp og geymt í 2 klukkustundir – skv. uppskriftinni á að geyma deigið í kæli en mér skilst að það sé allt í lagi að setja það strax í eldfasta mótið ef tíminn er naumur
Fylling
- Beikon steikt í ofni eða á pönnu. Ef ofn er notaður er hann stilltur á 180°C (blástursstilling). Beikonið sett á bökunarpappír og steikt í ofninum í u.þ.b. 10 mínútur (ágætt að snúa því við eftir 8 mínútur). Ef panna er notuð er best að steikja það á þurri pönnu þar til það verður stökkt. Ágætt að setja það á eldhúspappir og láta fituna renna aðeins af – beikonið skorið í bita
- Ofninn hitaður í 225°C (yfir- og undirhiti)
- Næst er eggjamassinn útbúinn – eggin léttþeytt með gaffli. Hveiti og rjóma hrært saman (ágætt að blanda fyrst litlu af rjómanum saman við hveitið) og blandað síðan saman við eggin. Kryddað (varast að salta of mikið þar sem beikonið er salt) – hrært saman
Samsetning
- Deigið tekið úr ísskápnum og þrýst í pæform (u.þ.b. 28 cm – passa að nota heilt form annars getur lekið úr því ) – látið ná vel upp með hliðunum og síðan stungið með gaffli
- Beikonbitum stráð jafnt í botninn, ostasneiðar lagðar yfir og síðan er eggjahrærunni hellt yfir
- Bakað í u.þ.b. 15 mínútur á 225°C en þá er hitinn lækkaður í 200°C og bakað í u.þ.b. 25 – 30 mínútur í viðbót
Meðlæti: Ferskt og brakandi gott salat.
Botn útbúinn
Beikon steikt í ofni
Fylling útbúin
Mjög gott nesti í flugið
