Þorskhnakki með humri og saffransósu
Uppruni
Mér finnst mjög skemmtilegt að útbúa rétti sem líkjast þeim sem hægt er að fá á veitingahúsum. Ég raða sjálf á diskana og ber réttinn þannig fram. Þessi er heimatilbúinn en uppskriftina að sósunni fékk ég hjá fósturpabba mínum. Hann hefur þróað hana í gegnum árin með humrinum sem þau eru alltaf með í forrétt á gamlársdag. Rétturinn er mjög góður og gaman að hafa í matarboði, saumaklúbbi eða bara þegar gera á vel við sig. Hann er frekar fljótlegur og þægilegur. Það má segja að sósan sé toppurinn yfir i-ið.
Forvinna
Upplagt að útbúa græna baunamaukið og sósuna eitthvað áður. Best að taka humarinn úr frysti daginn áður og láta hann þiðna í kæli yfir nótt.
Hráefni
Sósa
- 2 dl grunnur (Grunnur: Humarskeljar og u.þ.b. 3 – 4 dl vatn)
- 1 dl hvítvín
- ½ dl hvítvín
- 10 – 15 safranþræðir
- 1 msk humarkraftur (fljótandi)
- 2 dl rjómi
- Hvítur pipar og salt
- 1 – 2 msk sósujafnari (helst ljósan)
Fiskur
- 1 – 1,1 kg þorskhnakki, langa eða sambærilegur fiskur
- Hveiti
- Salt og pipar
- Smjör til steikingar
- 6 – 8 humarhalar
Grænt baunamauk
- 3 – 4 dl frosnar grænar baunir
- U.þ.b. ½ dl rjómi
- Salt og pipar
- Smjörklípa
Perlubygg
- 3 – 4 dl perlubygg
- 6 – 8 dl vatn
- Ögn af salti
Verklýsing
Sósan
- Mér finnst best að byrja á sósunni þar sem hún má alveg bíða. Grunnurinn er útbúinn með því að hreinsa humarinn (setja humarinn í kæli á meðan sósan er útbúin) og skeljarnar settar í pott ásamt vatni – gott að láta vatnið fljóta yfir. Suðan látin koma upp og soðið við vægan hita í u.þ.b. 15 – 20 mínútur
- Safran og ½ dl af hvítvíni sett í skál í u.þ.b. 10 – 15 mínútur (það er sagt að saffranbragðið komi betur fram ef því er blandað saman við vín – ekki síst sterkt áfengi). Gott að nota tímann og undirbúa græna baunamaukið eða fiskinn á meðan grunnurinn sýður
- Soðið sigtað frá og sett aftur í hreinan pott ásamt hvítvíninu, humarkraftinum og saffranvökvanum – suðan látin koma upp. Hiti lækkaður og rjóma bætt við ásamt, pipar og salti
- Nú er ágætt að láta sósuna standa á meðan fiskurinn, byggið og græna baunamaukið er matreitt. Ef einhver vökvi kemur af fiskinum eða humrinum er gott að setja hann í sósuna
- Þegar fiskurinn er settur í ofninn er ágætt að bæta sósujafnaranum við og láta suðuna koma upp (þá hverfur bragðið af sósujafnaranum)
Grænt baunamauk
- Vatn og ögn af salti sett í pott – hitað að suðu. Grænar baunir (frostnar) settar í sjóðandi vatnið og látið sjóða í 4 mínútur
- Örlítið af grænu baununum lagt til hliðar – afgangurinn settur í blandara eða matvinnsluvél og maukað. Smjöri bætt við ásamt smá af rjóma, salti og pipar. Lok sett yfir og geymt þar til bera á fram (ef maukið er gert löngu áður er ágætt að velgja það aðeins aftur)
Perlubygg
- Vatn léttsaltað og hitað að suðu. Perlubyggið sett út í og soðið á lágum hita í 20 mínútur. Það má alveg láta perlubyggið standa aðeins áður en það er borið fram
Fiskur
- Ofninn hitaður í 150°C (yfir og undirhiti)
- Fiskurinn skorinn í bita – u.þ.b. 150 – 180 g. Hveiti sett á disk og fiskinum velt upp úr því
- Panna hituð á tiltölulega háum hita – smjör brætt en ekki látið brenna (ágætt að blanda olíu líka saman við) og fiskbitarnir snöggsteiktir á öllum hliðum. Bitarnir settir í eldfast mót, salt og pipar stráð yfir og síðan inn í ofn í u.þ.b. 5 – 6 mínútur. (Ath. Gott að miða við að setja fiskinn inn u.þ.b. 15 mínútum áður en hann á að vera tilbúinn)
- Fiskurinn tekinn út úr ofninum og stillingu á ofninum breytt í grill. Beðið þar til hitanum er náð – humrunum raðað á fiskbitana og grillað í 4 – 6 mínútur (háð stærð á humri)
Framreiðsla (á stórt fat eða á disk fyrir hvern og einn)
- Græna baunamaukið tekið með skeið og dreift á diskinn – hringur á hann miðjan. Þetta má vera mjög frjálslegt (sjá mynd)
- Perlubyggið sett í miðjuna
- Fiskbiti er lagður ofan á byggið og sósu hellt yfir. Örlitill pipar mulinn yfir, saltflögum stráð yfir og skreytt með nokkrum grænum baunum
Grunnur gerður:
Grænt baunamauk
Fiskur steiktur og bygg soðið
Fiskur settur í eldfast mót og meðlæti að verða tilbúið
Humarinn snyrtur og lagður ofan á fiskinn
Samsetning
Þennan rétt er gott að eiga sem afgang