Ofnbakaðar kartöfluskífur með chili og parmesan
Uppruni
Þessi uppskrift er heimatilbúin.
Forvinna
Hægt er að forsteikja skífurnar og eiga aðeins eftir að hita þær og setja blönduna yfir.
Hráefni
- 1,5 kg kartöflur
- Vel af olíu
- U.þ.b. rúmlega 1 dl söxuð steinselja (persilja)
- 1 stk Chili – saxað
- U.þ.b. 1 – 1,5 dl Parmesanostur – rifinn
- Saltflögur og grófmalaður pipar
Verklýsing
- Ofninn hitaður í 200°C
- Kartöflurnar afhýddar ef með þarf – smekksatriði. Kartöflurnar skornar niður í sneiðar og þeim raðað í olíuborna ofnskúffu. Þunnar sneiðar eru fyrr tilbúnar en þær geta frekar brunnið. Gott að setja vel af olíu. Ég er yfirleitt með tvær ofnskúffur – báðar í ofninum í einu
- Kartöflurnar látnar krauma í ofni í 10 mínútur – tekið út. Kartöflunum snúið við – gott að láta þær kólna aðeins áður
- Sett aftur í ofninn og látið krauma í u.þ.b. 10 mínútur
- Blanda útbúin. Saxa niður steinselju og chili (nota annaðhvort ferskt eða þurrkað chili – allt eftir því hvað er til). Ríf parmesanost og blanda þessu öllu saman
- Tek út kartöflurnar og sameina þær sneiðar, sem ég sé að eru tilbúnar, í aðra skúffuna og set karföflunar, sem þurfa að vera lengur í ofninum, í hina – læt þær stutta stund í ofninn aftur
- Set allt í eina ofnskúffu eða í eldfast mót og strái blöndunni yfir
- Læt aftur í ofninn í 5 -10 mínútur
- Tek úr ofninum og set í skál (eða hef í eldföstu móti) – strái saltflögum og muldum pipar yfir
Gott með
Passar vel með allskyns kjöti og grillmat.
