Einfaldar og góðar smákökur
Uppruni
Hér kemur ný útfærsla af smákökum sem hafa slegið í gegn á heimilinu. Við erum að tala um kökur með brenndu smjöri, hvítu súkkulaði og ögn af sítrónukeimi. Best er að móta kúlurnar og geyma þær í kæli í nokkrar klukkustundir. Það má líka geyma þær óbakaðar í kælinum í nokkra daga. Þá er lítið mál að skella þeim í ofninn og bjóða upp á ilmandi smákökur á augabragði.
Hráefni
- 90 g smjör
- 100 g ljós púðursykur
- Sítrónusafi úr ½ sítrónu
- 50 g sykur
- 1 egg
- ½ msk vanilludropar
- 100 g hveiti
- ½ tsk matarsódi
- ½ – 1 tsk salt
- 100 g saxað hvítt súkkulaði eða dropar
Verklýsing
- Ofninn hitaður í 175°C – blásturstilling
- Smjörið brætt í potti (eins og þeytt smjör – sjá myndband) og tekið af hellunni – látið kólna aðeins. Nánari lýsing: Smjör er brætt á frekar háum hita. Þegar það er bráðnað kraumar í því og það myndast hálfgerðir kristallar á yfirborðinu og síðan froða. Á þeim tímapunkti fer að myndast litur í botninum – þá er potturinn tekinn af hellunni. Smjörið má alls ekki brenna en það er betra að það komi smá litur á botninn í pottinum – ef þessi ljósbrúna skán, sem myndast, er látin fylgja með kemur örlítill sætur og góður karamellukeimur af smjörinu
- Brennda smjörið, sykurinn og púðursykurinn sett í skál – hrært saman ásamt sítrónusafa og vanilludropum
- Eggi bætt við og hrært saman
- Matarsóda og salti blandað saman við ásamt hveitinu
- Að lokum eru súkkulaðibitarnir settir út í
- Gott að nota ísskeið til að móta kúlurnar og láta þær í kælinn í smástund – ef ég hef knappan tíma skelli ég þeim stutta stund í frystinn
- Hafa gott bil á milli kúlna þegar þær eru settar í ofnskúffu (með bökunarpappír undir) – kökurnar eiga til að stækka mikið. Bakaðar í 10 mínútur
Gott að setja kúlurnar í kæli áður en þær eru bakaðar
