Það toppar fátt þennan þristaís

Þristaís er ísinn minn

Servings: /Magn: U.þ.b. 1 lítri
Time: 30 mínútur + þarf að standa yfir nótt og fara í ísvél
Difficulty: meðal
Print

Uppruni

Eftir að ég eignaðist ísvél finnst mér alveg sérstaklega gaman að búa til hinar ýmsu tegundir af ís og er þessi þristaís klárlega vinsælastur á heimilinu. Einfaldur og góður og frábært að geta gripið í hann úr frystinum til að bjóða upp á í eftirrétt. Mér til gamans set ég hann í ískaldan Hönnupott og inn í frysti. Eftirrétturinn er þá bara klár beint úr frystinum á borðið.

Hráefni

6 dl rjómi
3 dl mjólk
3 – 4 dl púðursykur
3 egg
300 g þristar (6 stórir eða 18 litiir) – skornir í bita
1 dl sykur
Skraut: 1 – 2 pokar þristakúlur – saxaðar smátt. Einnig gaman að skreyta með öðru lakkrístengdu eða míni perlum

Verklýsing

Rjómi, mjólk, púðursykur og þristabitar sett í pott og hitað þar til þristar hafa bráðnað saman við blönduna. Lakkrísbitar þurfa ekki að bráðna
Tekið af hellunni og látið kólna
Eggjahvíturnar aðskildar frá rauðunum og lagðar til hliðar. Eggjarauðurnar þeyttar saman við sykurinn og þristablöndunni blandað varlega saman við. Gott að hafa í skál með loki
Eggjahvítur stífþeyttar og blandað mjög varlega saman við þristablönduna með sleikju. Lokið sett á skálina og geymt í kæli yfir nótt
Sett í ísvél daginn eftir. Gera þarf ísinn í tvennu lagi þar sem öll blandan kemst ekki ofan í ísvélina í einu – sett í box eða Hönnupott (gott að kæla hann fyrst aðeins í frysti)
Skrautinu dreift yfir í lokin

Ef þú átt ekki ísvél verður áferðin öðruvísi en þá má nota þessa aðferð: Rjóminn er þeyttur. Þristar og mjólk brætt saman – kælt. Púðursykur og sykur þeytt saman við eggjarauðurnar og þristablöndunni blandað saman við ásamt þeytta rjómanum. Eggjahvíturnar þeyttar og þeim blandað varlega saman við í lokin – sett í form og inn í frysti. Betra að setja plastfilmu yfir ef geyma á ísinn í frystinum.

Hráefni