Fljótleg og einföld pistasíukaka
Uppruni
Þessi kaka er tilkomin vegna þess hve mikið var til af pistasíuhnetum á heimilinu. Ég ákvað því að prófa mig aðeins áfram með pistasíuhnetuköku og er þetta útkoman. Kakan er sérstaklega saðsöm og alls ekki of sæt. Númer 1,2, og 3 þá er kakan afskaplega fljótleg og einföld – gráupplagt að bjóða upp á hana í eftirrétt þegar tíminn er naumur.
Hráefni
- 200 g pistasíuhnetur – malaðar frekar fínt í matvinnsluvél
- 1½ – 2 dl hvítir súkkulaðidropar (rjómasúkkulaðidropar eða dökkt súkkulaði)
- 100 g smjör – brætt
- 4 egg
- 1½ dl sykur
- ½ dl hveiti
Verklýsing
- Ofninn hitaður í 175°C (blástursstilling)
- Sykur og egg þeytt saman þangað til blandan verður létt og ljós
- Smjör brætt í potti, tekið af hellunni og súkkulaðidropum blandað saman við
- Hveiti sett út í pistasíumulninginn – sett saman við deigið og blandað varlega saman með sleikju
- Smjör og súkkulaði látið aðeins kólna í pottinum (súkkulaðið þarf alls ekki að bráðna saman við smjörið) blandað að lokum varlega saman við deigið með sleikju
- Deigið sett í smelluform 22 – 24 cm með bökunarpappír í botninum
- Bakað í 30 mínútur
- Skreytt með flórsykri og/eða berjum. Borið fram með þeyttum rjóma eða ís
Geymsla: Er best nýbökuð eða daginn eftir – jafnvel góð í nokkra daga við stofuhita.