Einfalt og ómótstæðilegt lakkrískonfekt
Uppruni
Þar sem lakkrís og súkkulaði er mjög vinsælt á heimilinu var ákveðið að búa til lakkrískonfekt um daginn. Það lukkaðist alveg ljómandi vel og er komið á jólakonfektlistann enda alveg sérstaklega gott, einfalt og fljótlegt. Stundum bæti ég við chiafræjum við mismikinn fögnuð heimilisfólksins.
Hráefni
- 150 g þristar
- 150 g suðusúkkulaði
- 150 – 250 g rjómasúkkulaði
- 1 poki lakkrísreimar – skornar í litla bita
- 3 – 3½ dl Rice Krispies eða Corn Flakes
- Lúka af chiafræjum (má sleppa – ekki alltaf vinsælt)
Verklýsing
- Suðusúkkulaði, þristar og rjómasúkkulaði látið bráðna yfir heitu vatnsbaði – ekki hafa of háan hita á hellunni þannig að vatnið sjóði (ekki gott ef skvettist vatn í súkkulaðið)
- Lakkrísbitunum og Rice Krispies bætt við súkkulaðiblönduna – hrært saman
- Blandan sett í form eða skúffubotn með bökunarpappír undir og dreift úr henni þannig að þykktin verði u.þ.b. 2 cm (þarf alls ekki að ná út í öll hornin). Sett inn í kæli í 1 – 2 klukkustundir
- Tekið út og skorið í bita. Sett í box og geymt í kæli
Geymsla: Geymist vel í lokuðu íláti í kæli.
