Gratinerað gærnmeti - tilvalið meðlæti
Uppruni
Fann þessa uppskrift í frönsku tímariti en eftir nokkrar breytingar finnst mér þessi útgáfa best. Hún hentar líka vel fyrir ketófólkið í fjölskyldunni.
Forvinnsla
Réttinn er hægt að útbúa fyrr um daginn. Þá er annað hvort hægt að fullelda hann og hita aftur rétt fyrir matinn eða eiga bara eftir sjálfa eldunina í ofninum. Ath. ef fatið er geymt í kæli er betra að taka það út eitthvað áður. Kælingin gæti hægt á elduninni.
Hráefni
- 800 g sambland af kúrbít/graskeri/blómkáli
- 2 hvítlauksrif
- 2 egg
- ½ dós sýrður rjómi (90 g)
- 100 g rifinn ostur
- U.þ.b. 4 msk olía fyrir steikingu og smurningu á eldfasta fatið
- Salt og pipar
Verklýsing
- Kúrbítur og blómkál skolað og biti af graskeri flysjaður. Allt skorið í tiltölulega þunnar sneiðar. Hvítlaukur saxaður. Olía hituð á pönnu og hvítlaukurinn látinn malla aðeins í olíunni. Grænmetinu bætt við og steikt á meðalhita í u.þ.b. 10 mínútur eða þar til allt grænmetið hefur aðeins mýkst. Saltað og piprað
- Ofninn hitaður í 180°C (yfir- og undirhiti)
- Eldfast mót smurt með olíu og grænmeti dreift yfir fatið. Mér finnst fallegt að raða lagi af sömu grænmetistegund í fatið en það er smekksatriði
- Egg, sýrður rjómi og rifinn ostur sett í skál og pískað saman (blandan er frekar þykk). Blöndunni smurt yfir – piprað og saltað
- Sett í ofninn og bakað í u.þ.b. 35 mínútur
Ath. Það ræðst svolítið af þykktinni á grænmetinu hversu langur bökunartíminn er. Ef sneiðarnar eru þykkar þá tekur það lengri tíma.
Meðlæti
Á vel við með ýmsum kjöt- eða fiskréttum eða bara eitt og sér.
