Fiskibollur með dilli
Uppruni
Þessi uppskrift er frá mömmu og er í miklu uppáhaldi. Í þennan rétt er tilvalið að nota frosna ýsu.
Forvinna
Hægt að undirbúa daginn áður eða fyrr um daginn með því að skera fiskinn í bita og útbúa deigið. Þá er bara eftir að steikja bollurnar.
Hráefni
- 800 g fiskur (ýsa) hreinsaður og roðlaus
- 1 dl hveiti
- 1 dl kartöflumjöl
- 4 dl mjólk
- 1 egg
- 2 tsk salt
- 1 msk dill (ef ferskt þá þrefalt meira magn)
- Svartur pipar
- Repjuolía og smjör til steikingar t.d. lífræn frá Rabsöl
Verklýsing
- Fiskur skorinn í bita og settur í hrærivélarskál ásamt hveiti og kartöflumjöli
- Hrært með hrærara þar til að fiskurinn tætist í sundur
- Mjólk, eggi, dilli, salti og pipar bætt við. Smekksatriði hversu lengi er hrært með hræraranum – ef lítið er hrært verða fiskbitarnir grófari en blandan verður jafnari við meiri hrærun. Sumum finnst betra að deigið sé þynnra en þá er sett aðeins meiri mjólk út í
- Best er að nota skeið til að raða deiginu á pönnuna
- Pannan hituð og bollurnar steiktar upp úr olíu – við meðalhita
- Bollurnar steiktar báðum megin þannig að þær séu fallega brúnar
- Þá eru bollurnar settar í pott á lægsta hita þannig að þær fái að jafna sig – þar mega þær bíða þar til þær eru snæddar
Meðlæti
Gott með kartöflum, bræddu smjöri og fersku salati.
Geymsla
Bollurnar geymast vel í kæli.
