Dýrindis rúgbrauð

Servings: /Magn: 1 mjög stórt brauð eða tvö minni
Time: 10 - 12 klukkustundir
Difficulty: auðvelt
Print

Uppruni

Þessi uppskrift kemur frá brauðbakaranum Önnu Ólafs en hún bakar mikið af dýrindis brauðum. Ég hef bæði bakað brauðið í mjólkurfernum, Hönnupotti og í einu stóru brauðformi. Ath. Uppskriftin er stór svo það má gjarnan helminga hana og nota minna form (ein mjólkurferna – 1½ lítri). Það er sérstaklega auðvelt að búa rúgbrauðið til en það þarf að vera í ofninum á lágum hita yfir nótt.

Bakað í Hönnupotti:. Gott að mæla stærðina á pottinum til að sjá hvað rúmast mikið í honum – uppskriftin er 2½ lítri. Ath. Það er einnig möguleiki að baka brauðið í pottlokinu til að fá annað lag á það og nota þá botninn sem lok. Mikilvægt er að smyrja pottinn með olíu áður en deigið er sett ofan í. Lokið sett á og bakað.

Hráefni

3½ bolli rúgmjöl
4½ bolli heilhveiti
3 tsk salt
2 tsk matarsódi
300 g síróp
200 g maltextrakt (ef ég hef ekki fundið það þá nota ég bara maltöl)
1 lítri súrmjólk

Verklýsing

Ofninn hitaður í 100°C (yfir- og undirhiti)
Matarsódi settur út í súrmjólkina
Öllu hráefni blandað saman í skál
Bakað í mjólkurfernum (uppskriftin rúmast í 3 x 1 lítra mjólkurfernu eða þremum litlum) eða í stóru formi (tveimur litlum) í 10 – 12 klukkustundir. Ágætt að smyrja formið – þá er auðveldara að ná brauðinu úr því (á ekki við um mjólkurfernur). Látið kólna í forminu. Ath. ef bakað er í mjólkurfernu má ekki fylla hana þar sem deigið á eftir að lyfta sér

Ath. Þegar bakað er í mjólkurfernu kemur minni skorpa en þegar bakað er í formi. Gæta þess að loka fernunni ef hún liggur á hliðinni. Einnig má láta mjólkurfernurnar standa uppréttar